Киирии

Киирии

Туох кистэлэ кэлиэй, Бүлүү умнаhын улуустарыттан Мииринэй куоратыгар кэлэр атыы-тутуу олус аҕыйах.

Арай ыаллыы сытар кириэстээхтэр бородууксуйаларын «Юбилейнай» эргиэн Киинин оччугуй лааппытыгар атыылыылларыттан дьон арахпат.

svet

Аны быйыл саас суолбут хаайан, Кириэстээх («Табаҕа» ХЭУо) павильона лигиччи хатанан турда. Онтон ыла билигин алмастаах Мииринэй маҕаһыыннарыгар олохтоох бородууксуйа суоҕун тэҥэ. Мантан сайын баҕалаах бородууксуйабыт кэлэрин кэтэһэбит. Урут Сунтаар урбаанньыттара, бааhынайдара Мииринэйгэ кэлэн атыылыы сатыылларын, араастаан туорайдаhан мэhэйдэhэр этилэр. Сунтаардары саньытаарынай-эпидиэмийэ быраабыла чэрчитигэр сигэнэн, хонтуруоллааччылар хасыhан да биэрээхтииллэрэ. Бүлүүлэр, ньурбалар, Мииринэйгэ атыыларын тэнитиэх буолан иhэн, хоччорхой сыhыаны ылыммакка, кэлэйэн кэлбэт да буолбуттар.

Мин бүгүн кэпсиэм этэ, Сунтаартан Мииринэйгэ баар туорйадары туораталаан, кириэтэhэн туран эргинэр саха дьахтарын –  Светлана Гаврильевна Павлованы. Кини Сунтаар улууhун Уһун Күөлүгэр бааhынай хаhаайыстыбатын салайар. Сүрдээх кичэллээхтик биэбэйдэммит моркуоп, хортуоппуй, хаппыыста, оҕурсу, помидор олордор бааhыналардаахтар. Оттон Сунтаар улууhун диэки оттуур алаастара да дьоhуннар. Дойду сир ото хото үүнэр дьоhун ходуhалардаах. Кытай тыраахтырдаах буоланнар оттуулларыгар улаханнык абыраммыттар.

svet1

Светлана – Уhун Күөлгэ кийиит. Сунтаар Бордоҥуттан кииннээх. Булчутунан биллибит Омуков Хабырыыс улахан кыыhа.Светлана Гаврильевна билигин туруу үлэhит дьиэ кэргэн амарах ийэтэ, обургу хаhаайыстыба салайааччыта. Мииринэйгэ хас сайын, күhүн ахсын кэлитэлээн, Светлана Павлова тыа хаhаайыстыбатын бородууксуйатын батарар идэлээх. Онто барыта санаабыт курдук ситиhиилээх буолааччыта суох. Арыт оҕурсуну, помидору, үүт астары – суораты, иэдьэгэйи, ынах арыытын Мииринэй ырыынагар илдьэ кэлэн баран, уhун күнү быhа атыыта барбакка мунчаарбыт түгэнэ да үгүс. Ыраах сиртэн кэлбит киhиэхэ айанын ороскуота – туспа кыһалҕа. “Материктан” уонна Ленскэйтэн кэлэр бородууксуйа улахан күрэстэһиини таһаарар. Күһүөрү мииринэй даачалаахтара ырыынакка бэйэлэрин үүнүүлэрин эмиэ батараллар. Аны мииринэйдэр бэйэ билэр дьонуттан эрэ атыылаһа сатыыр үгэстээхтэр.

svet2

Дьэ ол да буоллар, хас эмэ уонунан сыллар тухары Светлана сыралаахтык үлэлээн, сыалын-соругун ситиhэн тэйэр. Бородууксуйатын хааччыстыбата үчүгэй, сибиэhэй диэн киниттэн мииринэйдэр бэркэ атыылаhар буоллулар.

Аны Светлана Гаврильевна Сунтаар улууhун аатыттан Мииринэйгэ ыытыллар «Алмазная провинция» дьаарбанкаҕа хайаан да кыттар. Былырыын «Ситим» медиа-бөлөх, Мииринэй оройуонун дьаhалтата уонна Cаха сирин тыатын хаhаайыстыбатын министиэристибэтэ тэрийбит дьаарбаҥкатын кытары Чернышевскайга кытары тиийсэ сылдьыбыта. Онно ахсынньы ый бүтэhигэр, томорооон тымныыга Чернышевскай кииннэммит ититииттэн араарыллыбыт тымныы хаһааны биэрбиттэр этэ. Ахсынньы аам-даам тымныытыгар «тепловой» пушка туруоран эрэ баран атыы-тутуу аатыгар эрэ ыытыллыбыта.

svet3

Киhи хайгыыра баар – Светлана Гаврильевна тымныы, ардах,хаар диэбэккэ бэйэтин өлгөм үүнүүтүн Мииринэйгэ атыылыы кэлбитэ эрэ баар буолааччы. Светлана бородууксуйатын ситиhиилээхтик батаран, дьонугар суумка муҥунан толору кэhиилээх Сунтаардаабыта эрэ баар буолар. Кини курдук тиhигин быспакка Мииринэйгэ тыатын сирин бородууксуйатын батара кэлэр саха киhитэ суох. Онон, Светлананы нууччалыын-сахалыын бары билэллэр. Сытыы-хотуу дьахтар, ханнык да омук дьонун кытары тапсар, сатаан кэпсэтэр. Оттон Мииринэйгэ олорооччулар Светлана Павлова илдьэ кэлбит бастакы хомуур хортуоппуйун, салаатын, моркуобун, уулаах отонун, сугунун, дьэдьэнин барыанньатын куруук кэтэһэр. Аны, үүтүн, суоратын, сүөгэйин, сиикэй арыыны кытары ытыллыбыт иэдьэгэйин минньигэһэ, сибиэhэйэ! Ынах арыытын бэйэтэ «чохуонускайдыы» таптайар эбит. Чохооно икки араастаах буолар – боростуой уонна лэппиэскэлээх. Бу - улахан сүрэхтэн, үлэттэн тахсар. Бородууксуйаны оҥорон баран, аны саамай ыарахана – сатаан, табыгастаахтык батарыы кыһалҕата тириир. Маны барытын сааhылаан түмүктээтэххэ, Светлана Гаврильевна манна кэлэр сэдэх атыыһыттартан биир саамай сатабыллаахтара уонна кэтэһиилээхтэр буолар. Киниттэн холобур ылан, олук үктэhэн Мииринэй куорат атыытын-тутуутун ситимигэр Бүлүү умнаhын тыаларыттан бааhынайдар хорсуннук киирэллэрэ буоллар...

Станислав Алексеев, Мииринэй куорат. Ааптар хаартыскалара.     

Тарҕат:

Ырытыыгын суруй

Защитный код
Обновить