“Таатта” бааҥҥа өрөспүүбүлүкэ үгүс тэрилтэлэрэ уонна чааһынай дьон харчытын эрэнэн эргитэр. Инньэ гынан, күн бүгүн бааҥҥа буола турар быһыы-майгы олохтоохтору долгуппат буолуо суоҕун сатаммат.
Бу кэмиэрсийэ баана Саха сиригэр 1990 сыл ахсынньы 20 күнүттэн ыла үлэлиир. Тигинэччи үлэлии олорбут баан үлэтэ бэҕэһээҥҥиттэн ыла улаханнык харгыстанна. Кырыымҥа эҥин баар салаалара сабыллыбыттар. Дьокуускайга сүрүн офистара эрэ үлэлиир. Туохтан сылтаан маннык быһыы-майгы тахсыбытын салалта быһаарбат. Сүрүн офистарыгар биир да быһааран биэрэр кыахтаах салайааччы суох, салалта барыта уурайбыт диэн буолла. Счеттан харчыны устуу 30 тыһ. солк. диэри хааччахтаммыт. Бу үлүгэр уоппуска эҥин кэмигэр дьон уоппускатын харчытын да устар кыаҕа суох буолла. Бааҥҥа билигин да уһун-унньуктаах уочарат.
Социальнай ситимнэринэн араас хобдох иһитиннэриилэр тарҕаналлар. Саатар, баар балаһыанньаны үчүгэйдик быһааран биэрэллэрэ буоллар, маннык улахан араллаан тахсыа суох этэ. Дьиҥэ, бу баанынан эргийэр үп өрөспүүбүлүкэ харчыта буоллаҕа. Онон саха дьонун интэриэһэ биир бастакынан болҕомтоҕо ылыллыахтаах. Уурдарыылаах дьон интэриэһин РФ сокуона, былаас хайаан да көмүскүөх тустаах. Ил Дархан эбээһинэһин быстах кэмҥэ толорооччу Айсен Николаев бу балаһыанньаны хонтуруолга ылара уолдьаста.
