Ил Дархан эбээһинэһин быстах кэмҥэ толорооччу Айсен Николаев өрөспүүбүлүкэҕэ “Газпром – детям” бырагыраама чэрчитинэн үс социальнай-култуурунай эбийиэги тутар миэрэлэр тустарынан уурааҕы таһаарда. Бу туһунан баһылык уонна бырабыыталыстыба пресс-сулууспата иһитиннэрэр.
Ол курдук, Алдан куоракка, Нерюнгри Чульманыгар уонна Дьокуускай Мархатыгар физкультура уонна чэбдигирдэр комплекстары тутууга сир учаастактара бэриллиэхтэрэ. Бу үс эбийиэк Саха сирэ уонна “Газпром” ПАУо кытары түһэрсибит сөбүлэҥин чэрчитинэн тутуллуоҕа.
Алдаҥҥа 3 150 кв. м иэннээх, улахан дьон уонна оҕолор сөтүөлүүр бассейннардаах физкультура чэбдигирдэр комплекса тутуллуоҕа. Чульман бөһүөлэгэр 3 350 кв м иэннээх, катоктаах баараҕай комплекс тутуллуоҕа. Онно биирдэ 120 киһи тэҥинэн хаҥкылыыр кыахтаныаҕа. Марха түөлбэтигэр эмиэ бассейннаах, катоктаах физкультура-чэбдигирдэр комплекса тутуллара былааннанар.
Бу эбийиэктэри эһиилгиттэн туппутунан барыахтара уонна Саха АССР тэриллибитэ 100 сылын көрсө тутан бүтэриэхтэрэ. Бу үс эбийиэк уопсай суумата быһа холоон 1,7 млрд солк. буолуоҕа. Бу иннинэ “Газпром – детям” бырагыраама чэрчитинэн киин куоракка элбэх функциялаах спорт комплекса тутуллан турар.
