Бэнидиэнньиккэ Кириэстээх илин өттүнэн ааһар уот лииньийэтин тула сүпсүлгэн бөҕөтө буолла.
Бүлүү өрүһү Кириэстээх аннынан ВОЛС ситимин грозотроска кыбытыллыбыт биир эрэ утаҕын туора бырахтылар. “Дальэнергоремонт” монтажниктара эрэйинэн да буоллар хаабылы туораттылар. Манан үлэ түмүктэнэн хаалбат. Аны биир утах уот лииньийэтин иһинэн тардыллыан наада. Ол харгыстанан турар. Тоҕо диэтэххэ, урут суруйан аһарбытым курдук, атын бэдэрээччиккэ –“Связьремстройдарга” хаабыл суох. Мииринэйтэн Сунтаар улууһугар диэри ВОЛС ситимин тардыыга 220 кВ 241 №-дээх тимир лиинньийэтэ сулууспалыыр. Оптоволокно хаабылын уот ситимин икки «грозотрос» утумнарынан (хаҥас, уҥа утахтар) тардыллыахтаахтар.
Кэтэһиилээх оптоволокно хаабылын биир утаҕын «Связьремстрой» ( Кострома куорат) үлэhиттэрэ тардыахтаахтарын, сол да хаабыллара суох буолан күүтэн олороллор. «Связьремстрой» тардар оптоволокнотын хаабыла - Германия собуотун бородууксуйата. Онно оптоволокно хаабылын тахсыытыгар тохтобул буолбут. Инньэ гынан дьыаланы атахтаабыт.
«Саха телекоммуникации» тэрилтэ эппиэттиир учаастагар оптоволокно хаабыла Сунтаар сэлиэнньэтигэр диэри, былыр быраҕыллыбыт эргэ «104 кВ» лиинньийэ ыллыгынан барар.
Хаабылы сир аннынан, 90 см. дириҥник көмөн ыытыллыахтаах этэ да, ону туһааннаах миэстэтигэр уура иликтэр. Интэриниэт оптоволокно хаабыла сир үрдүгэр сытар. Ону Кириэстээх олохтоохторо хас да сиргэ көрбүттэр. Холобур, Кириэстээхтэн Тойбохой диэки хайысхаҕа, Сыстаҥ сайылыгыттан чугас Таалалаахха хаабыл мас үрдүгэр туох да хонтуруола суох эриллэ сытарын отчуттар дьиибэргээбиттэр. Хаһан бу хаабылы көмөллөрө биллибэт. Бу күннэргэ хаабылы уурааччылар үлэни саҕалыахтарын наада. Хаалбыт икки күһүҥҥү ыйдарга хаабылы көмөн бүтэрбэтэхтэринэ дьыала хаахтыйар дьылҕалаах. Алтынньыга айан суола да сабыллар, сир да тоҥор.
Дьэ ити курдук, бигэ, түргэн, хааччыстыбалаах Интэриниэт Бүлүү бөлөх оройуоннарыгар кэм да эрэй, эрэдээк бөҕөнөн иһэр эбит.
Станислав Алексеев, Мииринэй к.
«Инсел» саайтан хаартысканан иллюстрация.
