Саха сиригэр дьиэ сыаната үрдүүрүн сылыктыыллар. Бу туһунан СӨ Тутууга миниистирэ Павел Аргунов иһитиннэрдэ. Кини этэринэн, дьиэ сыанатын үрдээһинэ НДС ыстаапката улааппытыттан итиэннэ дойду сокуоннарыгар уларытыылар киирбиттэриттэн тутулуктаах.
“Биллэн турар дьиэ сыаната үрдүөҕэ. НДС ыстаапката үрдээн тутуу матырыйаала уонна тутуу өҥөтө ыараан биэриэҕэ. Онон дьиэ сыаната үрдүүрүттэн ханна да куоппаппыт. Маны таһынан, от ыйын 1 күнүттэн эскроу-счет диэҥҥэ көһөргө күһэллиэхтэрэ. Ону бары тутар хампаанньалар кыанар кыахтара суох, онон ырыынактан туоруохтара”, — диэтэ миниистир.
Күн бүгүн Саха сирин биир да тутар тэрилтэтэ саҥа быраабыланан үлэлээбэт. Павел Аргунов этэринэн, чопчу ханнык тэрилтэлэр саҥа уларыйыыларга көһөөрү сылдьаллара биллибэт, ол эрээри бөдөҥ эрэ тэрилтэлэр уларыйалларыгар саарбахтааһын суох эбит.
“Баан систиэмэтигэр уларыйан биэриигэ олус элбэх ыйытыылар бааллар. Биһиги кинилэри кытары бу чааһыгар элбэхтэ кэпсэтэн турардаахпыт. Билигин үксэ быһаччы баантан тутулуктаах буолуоҕа. Онуоха сорохтор халбархай суолу тутуһаллара да баар буолуо”, — диэн миниистир сыаналаата.
Кини этэринэн, били 44 ФС ((«О контрактной системе в сфере закупок товаров, работ, услуг для обеспечения государственных и муниципальных нужд») ылылларыгар тахсыбыт быһыы-майгы хатыланыан сөп. Оччолорго бааннар “хас эрэ суумаҕа мэктиэлэри ыһа-тоҕо түҥэппиттэрэ”. “Кыра тэрилтэлэр бааннарга харчы куду анньан биэрдэхтэринэ кинилэргэ счет арыйыахтара диэн эрэниэхтэрэ”, — диир миниистир.
Санатар буоллахха, саҥа сокуон быһыытынан, тутуу тэрилтэлэрэ дьиэни кыттыһан тутааччылар (дольщиктар) харчыларын туһаналларын күүскэ хонтуруоллуохтара. Ол чэрчитинэн, 2019 сыл от ыйын 1 күнүттэн тутуу тэрилтэлэрэ эскроу-счет систиэмэтигэр көһүөхтэрэ. Ол эбэтэр, дольщиктар укпут харчылара тутуу тэрилтэтэ эбийиэги туттарыар диэри тутар тэрилтэ счетугар буолбакка, атын анал счекка “хараллыахтара”. Тэрилтэ дьиэни толору туттарбытын кэннэ биирдэ баан ол счеттан харчыны тутар тэрилтэҕэ түһэрэр буолуоҕа.
