АЛРОСА Айхаллааҕы ХБК “Заря” туруупкатыттан алмааһы хостуур үлэтин саҕалаата. Бу туруупкаттан уонча сыл устата сир баайын хостуохтара.
Айхаллааҕы ХБК “Заря” алмаас баайдаах сирин туһаҕа таһаарыы хампаанньа биир бөдөҥ инвестициялаах быррайыагынан буолар: манна анаан хампаанньа 12 млрд солк. укпут. Маныаха саҥа ХБК тутар наада суоҕа улахан оруолу ылбыт. “Заря” туруупка Айхаллааҕы ХБК баара-суоҕа 3 км сиргэ баар. Саҥа туруупка саппааһа бүтэн эрэр “Комсомольскай” карьер үлэтин солбуйуоҕа, инньэ гынан Айхалааҕы ХБК тыына уһаан биэрэр.
2021 сылтан Айхаллааҕы ХБК сылга 1,25 мөл. т. урууданы хостуур кыаха тахсыаҕа. Быйыл номнуо 100 тыһ. кимберлит урууданы хостуур былааннаахтар. 300 м дириҥнээх сиртэн 11 сыл устата алмааһы хостуохтара.
Саҥа туруупкаҕа урууданы дэлби тэпьэрии хамаандатын Ил Дархан Айсен Николаев уонна АЛРОСА генеральнай дириэктэрэ Сергей Иванов үөрүүлээх быһыыга-майгыга биэрдилэр. Бу күннэргэ Мииринэйгэ “Хозактив-2019” форум үлэтин саҕалаата. “Заря” туруупканы үлэҕэ киллэриигэ бэлэмнэнии 2016 сыллаахха саҕаламмыта. Үс сыл устата туох баар туһааннаах инфраструктура барыта тутулунна.
