Бу сыл тохсунньу 1 күнүттэн үһүс эбэтэр онтон кэлэр оҕолоро төрөөбүт ыаллар ипотекаларын кирэдьиитин төлүүллэригэр 450 тыһ солк ылыахтара.
Бу туһунан ГосДумаҕа үп ырыынагын кэмитиэтин бэрэссэдээтэлэ, бу бырайыак ааптардарыттан биирдэстэрэ Анатолий Аксаков сиһилии маннык кэпсиир: “Дьиэ кэргэн ипотека ылбыт бааныгар тиийэн бу бырагырааммаҕа хапсарын туһунан этэр, оччоҕо баан ЕИСЖСка көрдөбүл ыытар. Оттон ЕИСЖС загса дьиэтиттэн бу ыалга чахчы үһүс эбэтэр онтон элбэх оҕо төрөөбүтүн туһунан бигэргэтэр. Ол кэнниттэн 450 тыһ солк ипотека кирэдьиитин төлүүргэ ыытар. Дойду үрдүнэн ипотека кирэдьиитин орто кээмэйэ 2,5 мөл солк тэҥнэһэр. Инньэ гынан, эрэгийиэннэргэ дьиэ кэргэҥҥэ улахан көмө буолара саарбаҕа суох”.
Бу төлөбүр ийэ хапытаалын курдук НДФЛ нолуогуттан босхолонор. Болдьоҕо 2022 сыл бүтүөр диэри. Быраактыка көрдөрөрүнэн, маннык күрдүк туһалаах бырагырааммалар болдьохторо уһуур. Холобур, ийэ хапытаала 2021 сылга диэри уһатыллыбыта. Муус устар ыйга Федерация Сэбиэтин спикерэ Валентина Матвиенко ийэ хапытаалын 2025 сылга диэри уһатар туһунан этии киллэрбитэ.
“Парламентская газета”
