От ыйын 8 күнүгэр РФ уопсастыбаннай балаататын мунньаҕар аҕа хапытаалын туһунан боппуруоһу дьүүллэстилэр.
Аҕа хапытаала үһүс уонна онтон кэлэр оҕоҕо бэриллэр буолуоҕа. Төлөбүр кээмэйэ ийэ хапытаалын саҕа буолара былааннанар. Ийэ хапытаала 2019 сылга диэри 453 тыһ солк тэҥнэһэр. Билигин дойду үрдүнэн баара-суоҕа 9 % элбэх оҕолоох дьиэ кэргэн баара биллэр. Аҕа хапытаалын көмөтүнэн бу көрдөрүү улаатара сабаҕаланар.
Тоҕо аҕа хапытаала диэн ааттаабыттара буолуой? Бастакынан, аҕа оруолун үрдэтэр сыаллаах, иккиһинэн, дьиэ кэргэн үбүн эр киһи быһаарар.
Уопсастыбаннай балаата көрдөрүүтүнэн, үгүс дьиэ кэргэн ийэ хапытаалын дьиэ-уот усулуобуйатын тупсарыыга туһаналлар эбит. Онтон оҕо үөрэҕэр ууруналлар. Элбэх оҕолоох ыалга үөрэх боппуруоһа бастакы миэстэҕэ турар. Аҕа хапытаалынан массыына, тыа хаһаайыстыбатын тиэхиньикэтин атыылаһыахтарын, кэтэх хаһаайыстыба эбэтэр бэйэ дьыалатын тэриниэхтэрин сөп.
