Бу туһунан от ыйын 25 күнүгэр Уһук Илиҥҥи федеральнай уокурук субъектарын социальнай сайдыытыгар көрүллэр үбүлээһин туһунан РФ бырабыыталыстыбатын мунньаҕар этилиннэ.
РФ бырабыыталыстыбатын бэрэссэдээтэлэ Дмитрий Медведев федеральнай бүддьүөттэн 15,5 млрд солк биэс эрэгийиэҥҥэ – Саха сиригэр, Приморскай кыраайга, Магадан уобалаһыгар, Сахалиҥҥа уонна Еврейскай автономнай уобаласка бэриллэрин туһунан эттэ. Онуоха Саха сиригэр 5 млрд солк көрүллүөҕэ.
“Бу үп үс сыл устата түһүөҕэ. 10 млрд солк курдук бу сылга түһэрэ күүтүллэр. Бу инженернэй уонна тыраанспар инфраструктуратын сайыннарыыга, социальнай эбийиэктэри тутууга туттуллуоҕа”, — диэн Дмитрий Медведев эттэ.
Ил Дархан Айсен Николаев Саха сирэ экономическай сайдыы көрдөрүүтүнэн Уһук Илиҥҥи уокурукка лидердэр кэккэлэригэр турарын эттэ. 2018 сыл түмүгүнэн дойду үрдүнэн 11 миэстэҕэ сылдьарын бэлиэтээтэ. Федеральнай бүддьүөттэн көрүллэр үбүнэн үс социальнай суолталаах эбийиэктэр тутуллалларын кэпсээтэ. Ол курдук, Хангалааска оскуола-дьыссаат, “Хотугу сулус” диэн төгүрүк сыл үлэлиир оҕо сынньанар, чэбдигирэр киинэ уонна 150 куойкалаах өрөспүүбүлүкэтээҕи кардиологическай диспансер. Бу 2024 сылга диэри дьон сүрэх-тымыр ыарыытыттан өлүүтүн 23% аччатар кыахтаах. Дмитрий Медведев Ил Дархан Айсен Николаев этиитин өйөөтө.
