“Алроса” хампаанньа АХШ-га буолбут аукциоҥҥа бриллианнарын атыылаата.
Ол курдук, аукцион түмүгүнэн 4,5 мөл $ киллэрдэ. Уопсайа 435 караттаах 255 бриллиант атыыламмыт. Олор истэригэр 21 регулярнай уонна 73 “Yellow, Pink уонна Purple” араас өҥнөөх бриллианнар бааллар. Ону таһынан, уопсайа 65 караттаах тоҕус өҥнөөх бриллианнар атыыламмыттар.
Аукциоҥҥа АХШ, Бельгия, Израиль, Кытай, Индия, Гонконг уонна Арассыыйа хампаанньалара кыттыыны ылбыттар.
“Биһиги Нью-Йорк куоракка ыытыллыбыт аукциоҥҥа араас өҥнөөх уонна быһыылаах бриллианнары көрдөрдүбүт. Манна 50 тахса хампаанньа кытынна. Ол иһигэр АХШ-тан килийиэннэрбит бааллар. Аукциону үчүгэй көрдөрүүлээх түмүктээтибит. Аҕалбыт бриллианнарбыт улахан аҥарын атыылаатыбыт”, – диэн “Бриллианты Алроса” филиал дириэктэрэ Павел Винихин иһитиннэрдэ.
Хампаанньа бу сылга икки аукциона буолар. Бастакы аукцион сайын ыытыллыбыта. Манна 3 мөл дуоллары киллэрбитэ.
