Арктика социальнай-экономическэй сайдыытын боппуруоһа болҕомто киинигэр турар. Ааспыт сыл ыам ыйыгар дойду бэрэсидьиэнэ Владимир Путин, Арктика састаабыгар Саха сирин аҕыс оройуонун киллэрэр туһунан ыйаахха илии баттаабыта.
Бу СӨ бырабыыталыстыбатын, Ил Түмэн, экспертнэй бөлөх уонна Арктика олохтоохторун бииргэ үлэлээһиннэрин түмүгэ буолар. Онон Арктика сиригэр көрүллэр судаарыстыба көмөтө Саха сирин 13 оройуонугар оҥоһуллар буолуоҕа.
“Арктика сирдэрин сайыннарыыга судаарыстыбаннай бырагырааммалар чэрчитинэн эдэр табаһыттары өйүүр бырагыраамма бигэргэннэ. Бу бырагыраамма чэрчитинэн 35-гэр диэри саастаах табаһыттар бэйэлэрин нэһилиэктэригэр дьиэ атыылаһалларыгар эбэтэр тутталларыгар биирдии мөлүйүөн солкуобайы ылар кыахтаннылар”, – диэн СӨ Арктика сайдыытын уонна хотугу норуоттар дьыалаларын миниистирэ Владимир Черноградскай бэлиэтиир.
