Мииринэй, 2020 сыл, муус устар 7 күнэ. Алмаас хампаанньата Саха сиригэр коронавирус тарҕаныытын уодьуганныыр үлэҕэ ыытар үбэ бу дьыл муус устар 6 күнүнээҕи туругунан 147 мөл. солк. тэҥнэстэ. Бачча үп кулун тутар ый бастакы күннэриттэн саҕалаан Мииринэй уонна Ленскэй оройуоннарыгар сэрэхтээх ыарыыны бохсорго көмөлөөх эминэн-томунан уонна мэдиссиинэ анал тэрилинэн хааччыйыыга ыытыллар.
Чуолаан билиҥҥи туругунан уопсайа 62 мөл. солк. тахса үп коронавирус баарын-суоҕун быһаарар экспресс-диагностиканы ыытар дьоҕус лабаратыарыйалары атыылаһыыга, ону сэргэ итиннэ туттуллар реагеннар нобуордары уонна тургутуктары хааччыйыыга барда.
Сотору кэминэн Мииринэй, Ленскэй уонна куораттыҥы тииптээх Айхал бөһүөлэгин оройуоннааҕы уонна куораттааҕы балыыһаларыгар анаан, аһымал санаа көмөтүн быһыытынан, бактыарыйаны уонна вируһу утарар препараттар, ингаляция суурадаһыннара, гормуоннар, инфузионнай суурадаһыннар, мэдиссиинэ оҥоһуктара уо.д.а. уопсайа 24.7 мөл. солк. суумаҕа ыытыллыахтара.
Итини таһынан 21 мөл. солк. суумаҕа балыыһаларга туттуллар, ыалдьыбыт киһи тыынарыгар салгын тэҥэ наадалаах ИВЛ (высокопоточнай оксигенация) аппарааттара, ону тэҥэ итиннэ туттуллар кислородтаах концентраттар, орон чугаһыгар туруоруллар монитордар кэмпилиэктэрэ ылыллыахтара. Билиҥҥитэ ити аппарааттары атыылыыр тэрилтэлэртэн хайаларын киэнэ ордугун тала сылдьаллар.
“АЛРОСА” Мэдиссиинэҕэ киинэ эмиэ дьон олоҕор куттал суоһаабатын хааччыйар уонна ыарыы буулуур сибикитин эрдэттэн билэргэ туттуллар оборудованиенан, медикаменнарынан хааччыллыа. Холобур, ыарыыттан сэрэнэр мэдиссиинэ мааскатынан хааччыллыы уустугун да иһин (о.и. уустук балаһыанньаны туһанан, бэйэ интэриэһигэр туһанар үспүкүлээннэр тустарыттан), билиҥҥитэ 300 тыһ. тахса мааска атыылаһыллыбыта. Ол улахан аҥаара Мииринэйгэ бэлиэр тиэрдиллэн турар. Итинтэн салгыы оҥорон таһаарыы былаһааккаларынан тарҕатыллыа. Маасканы атыылаһыы салгыы тэриллэр, сотору саҥа баартыйа кэлиэхтээх.
