Войти

Войти

Ил Дархан Айсен Николаев уонна өрөспүүбүлүкэ өссө биэс бэрэстэбиитэлэ баар АЛРОСА Кэтээн көрөр сэбиэтэ хампаанньа 2019 сыллааҕы үлэтин-хамнаһын түмүгүнэн ааҕыллыан сөптөөх дивиденд төлөбүрүн муҥутуур улахан кээмэйин – 47,65 млрд солк – төлүүргэ диэн сүбэлээтэ.

Бу дивиденд үс гыммыт биирэ Саха сирин бүддьүөтүгэр уонна эмиэ АЛРОСА аахсыйаларын бас билэр аҕыс алмаастаах түөлбэҕэ тыырыллыаҕа. Биир итиччэ кээмэй федеральнай бүддьүөккэ киириэҕэ.

Бүтүн аан дойду алмааска ырыынагар төһө да былырыын уустук сыл аастар, АЛРОСА үп өттүгэр үтүө түмүктэри ситистэ. Дивидени ааҕан таһаарарга төрүөт буолар “көҥүл үп сүүрээнэ” (свободный денежный поток) диэн ааттанар көрдөрүү 47,65 млрд солк. тэҥнэспит. АЛРОСА дивидени ааҕыыга бэлиитикэтигэр олоҕуран, иэс ноҕурууската кыра буолар түбэлтэтигэр ити этиллэр төрүөт көрдөрүү 70-тан 100 бырыһыаҥҥа диэри кээмэйин хампаанньа аахсыйалаахтарыгар дивиденд гынан түҥэтиэххэ сөп. Алмаастаах хампаанньа бу дьыл ыам ыйын 6 күнүгэр буолбут Кэтээн көрөр сэбиэтэ бэриллиэн сөптөөх суума муҥутуур улахан кээмэйин, о.э. 47.65 млрд солк дивидеҥҥэ ыытар сөптөөх диэн сүбэ биэрдэ. Атыннык эттэххэ, биир аахсыйа иһин, 6,47 солк. дивиденд көрүллэр.

Бу өлүүскэттэн алмаас хампаанньатын аахсыйатын 25% Саха сиригэр тиксэр. Ону таһынан, алмаастаах аҕыс түөлбэ хампаанньа аахсыйатын 8% бас билэр. Инньэ гынан Саха сирэ дивиденд быһыытынан уопсайа 15,7 млрд солк. ылыаҕа.

Санатан эттэххэ, 2018 сыллааҕы үлэ-хамнас түмүгүнэн ааҕыллыбыт дивиденд кээмэйэ АЛРОСА үлэлээн кэлбит устуоруйатыгар биир муҥутуур улаханнара этэ. Ол быһыытынан хампаанньа биһиги өрөспүүбүлүкэбитигэр биэрбит төлөбүрэ хаһааҥҥытааҕар да ботуччу буолбута. Чопчу сууматын ыйар буоллахха, Саха сиригэр 73,9 млрд солк. (о.э. биир аахсыйа иһин 10,04 солк.) ыытыллыбыта.   Онон 2018 сыл түмүгүнэн Саха сирин олохтоох бүддьүөтүгэр АЛРОСА 18,5 млрд солк. чугаһыыр үбү киллэрбитэ.

Тэҥнээн эттэххэ, 2017 сылга АЛРОСА бэйэтин аахсыйалаахтарыгар уопсайа 38,6 млрд солк. ыыппыт эбит буоллаҕына, итинтэн 9,6 млрд солк. Саха сиригэр анаммыта.

Ivanov ALROSA foto TASS

«Алмаас салаатыгар олус судургута суох кэм турдаҕына, аахсыйалаахтар киниэхэ эрэллэрин илдьэ сылдьалларын АЛРОСА үрдүктүк сыаналыыр. Хампаанньа Кэтээн көрөр сэбиэтэ 2019 сыл түмүгүнэн ааҕыллар дивидени былырыын бигэргэммит дивидент бэлиитикэтигэр олоҕуран уонна хампаанньа хас биирдии аахсыйалаахтарын интэриэһин учуоттаан туран, итинник сүбэни биэрдэ. Суоттаан-учуоттаан, ыараҥнатан көрөн тутуһуллар үп бэлиитикэтэ, хампаанньа кэнэҕэски уонна уһун кэмнээх үлэтин сыанатын торумнааһыҥҥа уонна көдьүүһүгэр болҕойуу биһиэхэ аахсыйалаахтар интэриэстэрин тэҥҥэ тутар уонна биисинэспит үп өттүнэн бигэ тирэхтээх буоларын хааччыйар кыаҕы биэрэр”, – диэн этэр, АЛРОСА генеральнай дириэктэрэ Сергей Иванов.

Дивиденд кээмэйин олохтоохтук бигэргэтиэхтээх хампаанньа аахсыйалаахтарын ааспыт сыл түмүгүнээҕи уопсай мунньаҕын чопчу хаһан ыҥырарын АЛРОСА Кэтээн көрөр сэбиэтэ бу ыам ыйын устата биллэриэ. Онон түҥэтиллэр дивиденд чопчу кээмэйин туһунан түмүктээх быһаарыыны аахсыйалаахтар уопсай мунньахтара бу дьыл бэс ыйын бүтүүтүгэр диэри быһаарыа диэн суоттаналлар.

Былырыын, 2019 сыл бэс ыйыгар, АЛРОСА Кэтээн көрөр сэбиэтэ дивиденд бэлиитикэтин туһунан Балаһыанньа саҥа эрэдээксийэлэммит көрүҥүн бигэргэтэригэр дивиденд төлөбүрүн кээмэйин быһаарыыга туттуллар ньыманы сиһилии чопчулаан турар.

Ол аата, үп отчуотун оҥорууга бигэргэммит норуоттар икки ардыларынааҕы ыстандаарка (МСФО) олоҕуран, хампаанньа туттарбыт консолидированнай отчуотугар олоҕурдахха, АЛРОСА 2019 сылга аахсыбыт ыраас барыһа 62,7 млрд солк. тэҥ.

Билэргит курдук, өрөспүүбүлүкэ бүддьүөтүн сүрүн өлүүскэтин АЛРОСА төлөһөр дивиденэ, нолуок быһыытынан киллэрэр үбэ хааччыйар. Ол курдук, холобур, былырыын Саха сирин бүддьүөтүн 40-тан тахса бырыһыана – АЛРОСА киллэрбит үбэ этэ.

Манна даҕатан эттэххэ, АЛРОСА федеральнай уонна түстэнэн үлэлиир эрэгийиэннэрин бүддьүөтүгэр нолуок уонна дивиденд быһыытынан биир сылга киллэрэр уопсай үбэ 100 млрд солк. тахса.

Тарҕат:

Добавить комментарий

Бүтэһик сонуннар