Муниципалитеттар баһылыктара сааскы халаан уутуттан эмсэҕэлээбит дьоҥҥо көмө харчыны биэрэн саҕалыахтаахтар. Бу туһунан ыксаллаах быһыы-майгы өрөспүүбүлүкэтээҕи хамыыһыйатын мунньаҕар эттилэр.
“Халаан уутуттан эмсэҕэлээбит дьоҥҥо көмө харчыны бу нэдиэлэҕэ биэриэххэ наада”, – диэн бырабыыталыстыба бэрэссэдээтэлин бастакы солбуйааччы Алексей Колодезников эттэ.
Ону таһынан, улуус иһинээҕи, улуустар икки ардыларынааҕы уонна өрөспүүбүлүкэтээҕи таһымнаах суоллары чөлүгэр түһэриигэ болҕомтотун уурда. Инфраструктура түргэнник оҥоһуллуохтаах диэн эттэ.
Халаан уутун содулун туоратар уонна чөлүгэр түһэрэр үлэлэри ыытар дирекция иһитиннэрбитинэн, сэттэ муниципалитетка 97 дьиэ ууга барбыт. Бу дьиэлэргэ холбоон 306 киһи олорбут. Ордук Докуускай куорат уокуругун, Жатай, Мэҥэ Хаҥалас уонна Хаҥалас улууһун олохтоохторо эмсэҕэлээбиттэр.
“Быһа холоон суоттааһын түмүгүнэн, хоромньу 64 мөл солк тэҥнэспит. Ол иһигэр 7,65 мөл солк биир кэмнээх көмө харчы киирэр”, – диэн дирекция салайааччыта Гаврил Слободчиков иһитиннэрэр.
