Олунньуттан ый аайы төлөнөр харчы (ЕДВ) кээмэйэ 2,5 бырыһыан улаатарын туһунан РФ Биэнсийэҕэ пуондата иһитиннэрэр. Ол туһунан РИА Новости суруйар.
ПФРга кэпсээбиттэринэн, билиҥҥитэ ити төлөбүрү дойду үрдүнэн 15,4 мөл. киһи ылар. Ол иһигэр инбэлииттэр, бойобуой дьайыылар кыттыылаахтара, радиацияҕа оҕустарбыт дьон, Сэбиэскэй Сойуус, Арассыыйа, Социалиистыы Үлэ Дьоруойдара уо.д.а. ылаллар.
Онуоха анаан Биэнсийэ пуондата индексацияны учуоттаан туран 450,6 миллиард солкуобайы көрүөхтээх.
Итини сэргэ 2,5 бырыһыанынан ЕДВ иһинэн киирэр социальнай өҥөлөр улаатыахтара. Онон федерацияттан чэпчэтиинэн (федеральные льготы) туһанар дьон талыахтарын сөп – социальнай өҥөнү бэйэтинэн оҥортороргу эбэтэр харчынан ылары.
Олунньуттан социальнай өҥө нобуорун сыаната 1075 солк. 19 харчы буолар. Ол иһигэр эминэн-томунан хааччыллыы – 828 солк. 14 харчы, ыарыыны сэрэтэр инниттэн сонотуоруйга путевка ылыы – 128 солк. 11 харчы, эмтэнэр сиргэ диэри кэлэр-барар көлө төлөбүрүн иһин – 118 солк. 94 харчы.
