М.К. Аммосов аатынан Хотугулуу-Илиҥҥи федеральнай университекка төлөбүрдээх үөрэх сыаната былырыыҥҥытааҕар үрдүө суоҕа. Бу туһунан университет пресс-сулууспата суруйар.
“Хоруона хамсыгыттан сылтаан, кэккэ ыалларга үп-харчы өттүнэн балаһыанньа сытыырхайбытынан, университет быйыл төлөбүрдээх үөрэх сыанатын үрдэтиэ суоҕа”, - диэн ХИФУ экэниэмикэҕэ проректора Герасим Павлов иһитиннэрбит. Маныаха, урукку сыллардааҕы чэпчэтиилэр оннунан хаалаллар. Төлөбүрдээх миэстэҕэ киирэр устудьуоннар ирдэниллэр СКЭ баалын алын кээмэйин куоһарбыт буолуохтаахтар, оччоҕуна чэпчэтииннэн туһанар кыахтаналлар. Маны таһынан, кыра бырыһыаннаах үөрэх кирэдьиитин туһаныахтарын сөп.
