Биһиги 9 ыйдаах кыһыннаах айылҕабыт, килиимэппит субтропиктаах Краснодары кытта тэҥнэспэт.
Биир үлэҕэ ороскуоппут кинилэрдээҕэр кырата икки бүк ыарахан. Федеральнай бүддьүөттэн регионнарга бэриллэр үпкэ Саха сирин тыйыс усулуобуйата учуоттанан элбэх үп бэриллиэхтээх диэн инньэ М.Николаев саҕаттан туруорсабыт да, кыайтарбакка кэлбитэ.
Дьолго, ити тымныы сыһыан ириэх чинчилэннэ. Соторутааҕыта Ил Дархан А.Николаев Москубаҕа сырыытын кэмигэр РФ үбүн миниистирэ А.Силуановы уонна РФ үбүн миниистирэ Л.Горнины кытта көрсөн, регионнарга бүддьүөт харчытын биэрии методикатын уларытары туруорсубут, дакаастаабыт. Үп министиэристибэтин салайааччылара “Айсен Сергеевич, дойдуга быйыл олус уустук кэм, дойду бүддьүөтэ кырыымчык, онон бу боппуруоһу кэлин көрүөхпүт” диэхтэрин сөбө. Ол эрээри, А.Николаевы кытта кэпсэтии кэннэ, биһиги кыһалҕабыт чахчы уустугун өйдөөн, методиканы уларыппыттар. Хаттаан ааҕыы түмүгэр биһиэхэ быйыл бүддьүөт сокуонунан көрүллүбүт үпкэ эбии 4 млрд. 984 мөл солк. кэлэр буолбут.
Ол аата Ил Дархан ааспыкка Москубаҕа сырыытын “өттүгүн харата” 991 мөл. солк. эрэ буолбакка, өссө биэс млрд кэриҥэ эбиллэн, 6 млрд солк буолан тахсар. Бу кырдьык, өрөспүүбүүлүкэ кэскилин туһугар улахан баартаах сырыы.
Ил Дархан инстаграмыгар А.Силуановка уонна Л.Горниҥҥа Саха сирин нэһилиэнньэтин кыһалҕатын өйдөөн Саха сиригэр бэриллэр үп кээмэйин хаттаан ааҕан, эбии көрбүттэригэр махтаммыт.
Түмүккэ, федеральнай бүддьүөттэн үбүлээһин методикатын уларытыы суолтатын туһунан эбии этиэҕи баҕарыллар. Ол аата, Саха сирэ быйылгыттан сыл аайы соҕуруу регионнардааҕар сүүйтэриитэ суох үбүлэнэр оҥкула охсулунна. Чахчы үтүө сонун!
