Саха сиригэр доруобуйа харыстабылыгар бастакы звеноҕа бөдөҥсүтүүнү (модернизация первичного звена) ыытарга 2021-2025 сс. федеральнай бүддьүөттэн 6 млрд тахса солк. көрүллүөҕэ. Бу туһунан эрэгийиэннээҕи доруобуйа харыстабылын министиэристибэтэ иһитиннэрэр.
“Нэһилиэнньэҕэ амбулаторнай-поликлиническэй көмөнү оҥоруу систиэмэтигэр биир бастакынан ыарыы профилактикатыгар болҕомтону ууран туран бастакы медико-санитарнай көмөнү тупсарыахпытын наада. Онуоха 2012 сылтан тустаах федеральнай сокуоннар, эмтээһиҥҥэ сыһыан уларыйыыта уонна үбүлээһин саҥа бэрээдэгэ олохтонон турар”, - диэн миниистир Елена Борисова эппит. Кини саныырынан, кэнники биэс сылга өрөспүүбүлүкэҕэ доруобуйа харыстабылыгар баайы-дуолу ааҕыы (инвентаризациялааһын), штатнай араспысаанньаны оҥоруу, хас биирдии эмтиир тэрилтэҕэ мэдэссиинэ көмөтүн улаатыннарыы күүскэ ыытыллыбыт. Доруобуйа харыстабылыгар бастакы звеноҕа модернизацияны ыытыыга 1444 устуука анал тэрили, ол иһигэр 822 тэрили эбии, оттон наадалаах тэрилинэн хааччыйыыга 622 устуука тэрили эмтиир тэрилтэлэргэ хааччыйары былаанныыллар. Маны таһынан балыыһаларга 301 массыынаны, ол иһигэр 124 саҥа массыынаны, 177 массыынаны уларытыыга ылыахтара. Ону сэргэ 166 эмтиир тэрилтэни тутуохтара, ол иһигэр түргэнник тутуллар модульнай 147 эбийиэги тутуохтара. 80 эбийиэккэ капитальнай өрөмүөн ыытыллыаҕа. Билигин дойду доруобуйа харыстабылын министиэристибэтигэр бу модернизация бырагырааматын сөбүлэһиннэрэллэр. Бу бырагырааманы Ил Дархан ахсынньы 15 күнүгэр дылы бигэргэтиэхтээх.
