Войти

Войти

СӨ т/х миниистирэ А.П. Атласов “Саха” тэлэбиидьэнньэтинэн тахсан, кэтэх хаһаайыстыбалар 35 тыһ. солк. көмө ылбыттарын отчуотугар улахан чэпчэтиилэр көрүллүбүттэрин туһунан бэрт үчүгэйдик, өйдөнөр гына быһаарбыта.

Ол эрээри, бассаабынан араас сурах-садьык тарҕанар.  “Манна бааһынайдар уонна т/х специалистара, өссө хонтуора үлэһиттэрэ алҕас саҥарбыт үһү диэн айдаан бөҕө,  кэтэхтэри күһэйэн уопсайдаарылар”, “Миниистир сыыһа саҥарда, 35 тыһ. син-биир отчуоттанар үһү дии олороллор!” дииллэр. Итини бигэргэтэн: “Ону отчуоттаппатахтарына бородууксуйалара ыһыллар, фермердэр эмиэ отчуот биэриэ суохтарын сөп курдук, куттала итиннэ сытар. Онон син-биир отчуот көрдүүллэр. Сыыһа саҥарбыт, алҕаска диэтилэр. Онтон миниистир да киһи буоллаҕа, сыыһара ханна барыай? Бүгүн мунньах бөҕө, зуум бөҕө буолбут, илин эҥээр улуустарга, КФХ группатыгар "сырдаттылар" - итинэн”, “Харчы минсельхозка минфинтэн кэлэр, государство харчытын син-биир отчуоттаталлар” диэн атыттар алын сыҥаах буолаллар. 

Эс, бу хайдах буолбут дьонуй, миниистири да итэҕэйбэт буолбуттар дуу диэн дьиктиргээн, А.П. Атласовтан суруйаары ыйыталастым. Тэлэбиисэртэн истибитиҥ салгыҥҥа сайҕанан сүтэр, оттон сурукка суруллубут – суоруллубат, бигэ эрэллээх. Александр Павлович улаханнык соһуйда: “Хайдах алҕас этиэхпиний, барыта кырдьык. Дьоҥҥо чэпчэтии оҥорорго, көмөнү сокуону кэспэт гынарга күүстээх үлэ барда. Саха Өрөспүүбүлүкэтин үпкэ, экэниэмикэҕэ, сиргэ уонна баайга-дуолга министиэристибэлэрин кытта улахан кэпсэтии ыытан, сөбүлэҥнэрин ыллыбыт. Дьэ, онон кэтэх хаһаайыстыба билигин 35 тыһ. солк ылан баран уһун-уһун отчуот түһэрбэт буолла. Хаһаайыстыбаннай кинигэнэн бачча ыанар ынахтаахпын диэтэҕинэ бүтэр. Отчуоттанар кэмҥэ ынаҕа баар буоларын, тыыннааҕын бигэргэтиэхтээх. Инники субсидия ылыытыгар, федеральнай ирдэбилинэн, т/х бородууксуйатын оҥорооччуларын быһыытынан кэлим реестрга киириэхтээх этилэр, өссө сиргэ 2,5 га эҥин диэн хааччах баара. Ону барытын туораттыбыт, билигин туох да ирдэммэт. Хаһаайыстыбаннай кинигэтинэн кини “кэтэх хаһаайыстыбабын, уһаайбалаахпын (приусадебнай учаастак)”  диэтэҕинэ бүтэр. Ходуһатыгар, атын сиригэр докумуон хомуйсан эрэйи көрбөт. Улахан кэпсэтии, үлэ баран, кэтэх хаһаайыстыбалаахтарга балай да улахан чэпчэтии киирдэ”, - диэн кэпсээтэ.

Күндү тыа сирин олохтоохторо, көрөргүт курдук, миниистир А.П. Атласов улахан чэпчэтии оҥоһуллубутун бигэргэттэ. Ким да кэтэхтэри кыһарыйан уопсайдыы сатаабат. Ол-бу сымыйа сурахтары итэҕэйбэккитигэр ыҥырабыт. Ил Дархан быһаарбыт көмө харчыта дьоҥҥо дьиҥнээх көмө буолан тиийиэҕэ.

Владимир Степанов.

Тарҕат:

Добавить комментарий

Бүтэһик сонуннар