Арассыыйа вице-премьерэ Марат Хуснуллин Өлүөнэ күргэтин тутууну өйөөбүт.
“Мин күргэни тутууну өйүүбүн, ол эрээри бырайыак үбүн кыччатыахха наада”, - диэбит тойон Хуснуллин. Кини Ил Дархаҥҥа, дойду көлөҕө министиэристибэтигэр, Росавтодорга уонна Главгосэкспертизаҕа икки нэдиэлэ иһигэр бырайыагы хаттаан көрөллөрүгэр, сыанатын аччатан оҥороллоругар сорудахтаабыт. Бырайыак хара маҥнайгыттан хапытаалынай ороскуотугар тутуу 77,9 млрд солк., оттон атын ороскуоттара 5,5 млрд кэриҥэ солк. диэн этэ. Онуоха “ВИС” хампаанньа бөлөҕө (бырайыагы оҥорууннан уонна тутууннан дьарыктанар) бэйэтин үбүттэн 20 бырыһыанын биэрэргэ бэлэм. Күргэ Эргэ Табаҕа аннынанан ааһан Мэҥэ Хаптаҕайыгар тиийиэхтээх. Күргэни тутуу 2025 сылга диэри Уһук Илини сайыннарыы бырагырааматыгар киирбитэ. Күргэ тутулуннаҕына аҥаардас таһаҕаһы тиэйии 3 төгүл улаатыахтааҕын сылыктыыллар – сылга 6 мөл. туонна.
