Саха сиригэр тутулла турар саҥа дьиэлэргэ кыбартыыра сыаната салгыы өссө да улаатар чинчилээх. Бу туһунан Саха сирин Билимҥэ Академиятын Арктикатааҕы билим-чинчийэр киинин учуонай-сэкэрэтээрэ Альберт Кардашевскай кэпсээбит.
“Саҥа тутуллубут дьиэлэргэ кыбартыыра сыаната хайа да түгэҥҥэ син-биир улаатар чинчилээх. Тоҕо диэтэххэ, хаарбах дьиэлэртэн көһөрүү бырагыраамата 2025 сылга диэри уһатылынна, чэпчэтиилээх ипотека бырагыраамата 2022 сылга дылы барар буолла. Онон дьиэ сыаната син-биир улаатыаҕа”, - диир учуонай. Маны таһынан, кини сотору кэминэн чааһынай дьиэ сыаната эмиэ үрдүүрүн сылыктыыр, тоҕо диэтэххэ, чэпчэтиилээх ипотеканы бааннар чааһынай дьиэ атыытыгар эмиэ күүскэ кимэн киллэрэн эрллэр. Кардашевскай 2% чэпчэтиилээх ипотека киирэн, Уһук Илиҥҥэ дьиэ сыаната чахчы үрдээбитин этэр. Ол курдук, биир сыл иһигэр Забайкальеҕа дьиэ сыаната 11%, Дьокуускайга — 15-20%, оттон Хабаровскай кыраайыгар — отой да 20-25% өрө көтөн тахсыбыт. Онуоха биир квадратнай миэтирэ дьиэ сыаната эрэгийиэннэргэ биллэ араастаһар. Холобур, Бүрээтийэҕэ 1 кв.м. дьиэ сыаната 62 тыһ. солк. эбит буоллаҕына, Саха сиригэр – 120 тыһ. солк., ордук Приморьеҕа уонна Сахалиҥҥа үрдүк – 140-150 тыһ. солк.
Дьиэ сыаната үрдүүрүгэр маны таһынан уопсай инфляция, тутуу матырыйаалыгар сыана эмискэ үрдээһинэ уонна оробуочай илии тиийбэтэ охсубут. Быйыл Саха сиригэр дьиэ сыаната 30% үрдээбитэ.
