Киирии

Киирии

АЛРОСА уонна Антверпеҥҥа баар аан дойдутааҕы алмаас Киинин (Antwerp World Diamond Centre, AWDC) салайааччылара Сергей Иванов уонна Ари Эпштейн бу дьыл муус устар 24 күнүгэр Москуба куоракка бииргэ үлэлэһэр туһунан саҥа Сөбүлэҥҥэ илии баттастылар. Кинилэри сэргэ Антверпен мээрэ Барт де Уэвер уонна Арассыыйаҕа үлэлиир Бельгия посола Жан Артур Режибо кытыннылар.

Сөбүлэҥ ырыынак ирдэбилигэр олоҕуран, табыгастаах кыттыгас үлэни кэҥэтэр ис хоһоонноох.

Тустаах, үс сыл болдьоххо түһэрсиллибит докумуон икки өрүккэ көдьүүстээх сыһыан олохтонуутугар төһүү буолуоҕа. Ол курдук, хампаанньалар алмаас-бирилийээн ырыынагын туһунан иһитиннэриини үллэстэр үгэстэрэ салҕаныа. Ону тэҥэ маркетинг көҕүлээһиннэрин кыттыһан кэҥэтиини, ол иһигэр бирилийээни бородууксуйа быһыытынан наадыйыы улаатарыгар туһаайар хас да көрүҥ маркетины тэрийэр былааннаахтар. AWDC АЛРОСА уонна да атын Алмааһы оҥорооччулар ассоциацияларын (Diamond Producers Association, DPA) өйүөх буолла. Ону тэҥэ икки өрүт көҕүлээһиннэрин олоххо киллэриигэ бэйэ-бэйэҕэ көмөлөсүһэр буолуохтаахтара этиллэр.

Биир төһүү болҕомто дьиҥ айылҕа алмааһын уонна онтон кырыыламмыт бирилийээн ырыынагар сымыйа, синтетическэй бирилийээн быыһылаан киириитин суох оҥорорго күүһү түмэн үлэлиэхтэрэ. Итинник икки көрүҥ алмаас атыытыгар кытаанах хонтуруол уонна бэрэбиэркэ баар буолуохтааҕын киллэрбиттэр. Ону таһынан AWDC синтетика буоларын-суоҕун быһаарар аппарааттары, ол иһигэр АЛРОСА (Diamond Inspector) бэлэмнээн таһаарбыт технологиятын туһаныыны, хонтуруол төһө уонна хайдах ыытылларын хонтуруоллуох буолла.

Өрүттэр Бүтүн аан дойдутааҕы алмаас сэбиэтин (World Diamond Council, WDC) мэктиэлиир Тиһигэр уларытыыны киллэрии чэрчитинэн үлэ өйөнүөхтээҕин, ону сэргэ тэрилтэ Кимберлискэйдээҕи Процесс састаабын бэрэстэбиитэлин быһыытынан эмиэ өйөнүөхтээҕин быһаарбыттар.

“Бельгия – алмаас атыытын аан дойдутааҕы киинэ, АЛРОСА биир бөдөҥ партнера. Аҥаардас былырыын Бельгия хампаанньалара алмааспыт хампаанньатыттан 2 млрд дуоллартан үгүөрү суумалаах алмаас сырьётун атыыласпыттар. АЛРОСА уһун кэмҥэ үлэлэһэр 55 килийиэннээҕиттэн 21 хампаанньа ити дойду киэннэрэ. Онон бииргэ үлэлэһии интэриэһэ хаһан баҕарар күүстээх.

“АЛРОСАҕа AWDС өрдөөҕүттэн үлэлэһэр, эрэллээх уонна баай уопуттаах партнер. Мин бу бу саҥа Сөбүлэҥ түһэрсиллиитэ ол сыһыаммытын лаппа бөҕөргөтүө, салааны сайыннарыы үлэтин киэҥ хабаанныа диэн эрэнэбин”, – диэбит АЛРОСА генеральнай дириэктэрэ Сергей Иванов.

«АЛРОСА уонна AWDC биир санааҕа кэлэн, бииргэ үлэлэспиттэрэ 15 сылтан орто. Күн бүгүн АЛРОСА – бүтүн аан дойду үрдүнэн алмаас сырьётунан хааччыйар бөдөҥ тэрилтэ. Бу хампаанньа Антверпеҥҥа атыыланар алмаас сырьётун 31 %-нын, турар сыанатынан 21 %-ы хааччыйар. Биһиги Арассыыйаны уонна АЛРОСАны кытта бииргэ үлэлэһэр уопуту үрдүктүк сыаналыыбыт. Кэнэҕэһин да бииргэ үлэлэһиибитин бөҕөргөтөргө кыһаллабыт. Арассыыйаҕа уонна Бельгияҕа алмаас-бирилийээн ырыынагын сайыннарар уопсай интэриэстээхпит», – диэн санаатын үллэстэр AWDC генеральнай дириэктэрэ Ари Эпштейн.

Тарҕат:

Ырытыыгын суруй

Защитный код
Обновить

Бүтэһик сонуннар