Киирии

Киирии

Tsodilo Resources Limited АЛРОСА Группа тэрилтэлэрэ Ботсванаҕа “Буревестник” НПП оҥорбут “ПОЛЮС-М” сэппэрээтэринэн бастакы алмааһы ороотулар.

“Буревестник” НПП – АЛРОСА Группа салаа тэрилтэтэ буолар. Tsodilo бу сэппэрээтэринэн 925 кг ыйааһыннаах, алмаас булкадаһыктаах концентраттан кимберлит уруудатын 56 боруоба алмааһын таҥастаан таһаарда. Ол түмүгэр холбоон 18,571 карааттаах 101 алмаас хостонно. Итинтэн муҥутуур улахан ыйааһыннаах кристалл кээмэйэ 1,375 караат буолбут.

Портативнай диэн ПОЛЮС-М сэппэрээтэри Tsodilo Resources ааспыт сыл ахсынньытыттан үлэҕэ киллэрбитэ. Бу тэрил алмаас састааптаах -8 +0,5 мм кураанах концентраттан биир чааска 100 кг эргитэн таһаарар кыамталаах. Сонун тэрил, этиллибитин курдук, дьоҕус. Хонуу усулуобуйатыгар геология чинчийиитин ыытыыга уонна урууданы байытыыга анаан бастаан толкуйдаан таһаарбыттара. Ону таһынан бу сэппэрээтэр олус элбэҕэ суох саппаастаах сиргэ алмааһы бырамыысыланнай байытыы эйгэтигэр да холкутук туттуллар, улаханнык көмөлөһөр кыахтааҕын көрдөрдө. Ыйааһына уонна кээмэйэ да олус улахана суох буолан, ыгыллыбыт салгыны уонна сөрүүкэтэр убаҕаһы да туттубакка эрэ үлэлиир кыахтаах. ПОЛЮС-М онон алмаас саппаастаах урууданы таҥастыырга туох да ааттаах, универсальнай установка диэн буолар. Бу тэрил уруудаҕа баар алмаастан 98 бырыһыантан кырата суох кээмэйин сиидэлээн таһаарар.

Маннык сэппэрээтэри сүрүннээн “АЛРОСА” АХ байытар баабырыкалара, чопчулаатахха, “Анаабыр алмаастара” тэрилтэ кыайа-хото туттар. Алмаастаах хампаанньа оҥорон таһаарар былаһааккаларыгар маннык тииптээх уопсайа 21 сэппэрээтэр үлэлиир.

“АЛРОСА” АХ хос тэрилтэтэ «Буревестник» НПП ААУо аан дойду үрдүнэн алмаас састааптаах урууданы таҥастыыр сэппэрээтэрдэри оҥорон, айан-тутан таһаарар биир бөдөҥ тэрилтэ быһыытынан киэҥник биллэр.

Бу сэппэрээтэр “Буревестник” тас дойдуга тиийэ туттуллар гына айан таһаарбыт соҕотох тэрилэ буолбатах. Бу иннинэ кинилэр оҥорбут 27 люминесцентнай сэппэрээтэрдэрин ЮАР Cullinan диэн алмаас саппаастаах сирин саҥа байытар баабырыката ылан туһана сылдьар. Cullinan 74 бырыһыана Petra Diamonds киэнэ.

 

Ыспыраапка:

Tsodilo Resources Limited – алмаас уонна тимир геологическай чинчийии эйгэтигэр үлэлэһэр норуоттар икки ардыларынааҕы таһымнаах хампаанньа. Ботсвана уонна Соҕуруу Африка сиригэр-уотугар хас да бырайыакка үлэлэһэр дьоһуннаах тэрилтэ.

Тарҕат:

Комментарии

Защитный код Обновить