Саха сиригэр өлүүлэһэн тутууга албыннаппыт дьону өйүүр сыаллаах быйылгы бүддьүөккэ 11 мөл. солк. көрдүлэр. Бу туһунан тутуу миниистирин солбуйааччы Никита Стасишин мунньах кэмигэр эттэ.
“Кыһалҕалаах эбийиэктэри үлэҕэ киллэрии быһаарыллыахтаах. Бу боппуруос дойду бэрэсидьиэнэ Владимир Путин тус хонтуруолугар сылдьар”, - диир Стасишин.
Билиҥҥи туругунан, Саха сиригэр 9 кыһалҕалаах эбийиэк баар. Оттон албыннаппыт өлүүлэһэн тутааччылар испииһэктэригэр 144 гражданин турар. 2018 сылга Чурапчы сэлиэнньэтигэр “Макрос” тутар хампаанньа ситэ туппатах икки 4-түү кыбартыыралаах дьиэлэрэ тутуллуохтара. Маны таһынан ЖСКлары (олорор дьиэни тутар кэпэрэтииптэри) тэрийэргэ былаанныыллар. Билигин тутууну тиһэҕэр тиэрдэргэ симиэтэ оҥоһуллар.
“Саха сиригэр кыһалҕалаах эбийиэктэри тутан киллэриигэ Ил Дархан дьаһалынан биэдэмистибэлэр икки ардыларынааҕы оробуочай бөлөх тэриллэн үлэлиир. Кинилэр ааспыт сылга 7 итинник дьиэни тутан киллэрдилэр. Инньэ гынан 226 өлүүлэһэн тутааччы бырааптара чөлүгэр түһэрилиннэ”, - диэн миниистири солбуйааччы эттэ.
