Иннинээҕи 2017 сыл төрдүс кыбаарталыгар тэҥнээтэххэ, быйыл бастакы кыбаарталга алмаас хостооһуна кыччаатар да, алмаас сырьётун атыыта иннинээҕи кыбаарталга холоотоххо, 43 бырыһыан үрдээн, 13,4 мөл. караакка тэҥнэстэ. Атыы-тутуу тупсуутун төрүөтэ саппааска сыппыт 6 мөл. карааты батарбыттарыгар сытар.
Инньэ гынан, хампаанньа үбү киллэриитэ иннинээҕи кыбаартал түмүгэр тэҥнээтэххэ, 58 % үрдээтэ. Ол курдук, 96 млрд солк. бородууксуйаны атыылаатылар. Маныаха атыы тутула уонна алмааска орто сыана үрдээбитэ эмиэ төһүү буолар.
2018 сыл 1 кыбаарталыгар көрдөрүүтэ 2017 сыл 4-с кыбаарталыттан 78 бырыһыан үрдээбит. Маныаха үбү киллэринии динамиката үтүө туруктааҕа уонна ночооту ааҕыныы-суоттаныы күүскэ барбыта көмөлөспүт.
Онон, бу үүммүт 2018 сыл бастакы кыбаарталын түмүгүнэн, АЛРОСА алмаастаах хампаанньа 33,2 млрд солк. ыраас барыһы аахсан, иннинээҕи кыбаартал көрдөрүүтүн икки бүк куоһарда.
Ити этиллэр кэмҥэ 41,1 млрд солк. суумалаах үп көҥүл сүүрээнэ (свободный денежный поток) баар эбит буоллаҕына, күн бүгүн ити көрдөрүү 3,5 төгүл үрдээбит. АЛРОСА ыраас иэһэ бу бастакы кыбаартал туругунан, 4,6 төгүл кыччаан, 18,6 млрд солк буолла. Бу иэс кыччааһына эргииргэ көҥүл сылдьар сүүрээн улааппытын уонна гаас актыыбын атыытыттан киирбит үп эбиллибитин суотугар тахсыбыт.
«2018 сыл 1-кы кыбартаалыгар АЛРОСА үп көрдөрүүтүн биллэ тупсарыыта, сүрүннээн, ырыынак конъюнктуратын тупсарыы, ону бэйэ туһатыгар толору туһаныы уонна ону таһынан ночоот тахсыытын кытаанах хонтуруолга ылыы түмүгэр ситистибит”, — диир АЛРОСА АХ (ПАО) бырабылыанньатын бэрэссэдээтэлэ Сергей Иванов.
