Киирии

Киирии

«Күн күнэ» диэн быйыл бэс ыйын сүүрбэ ордугуна биирис күнүгэр ити былыр-былыргыттан саха урааҥхайдар ыһыах ыһар, мэҥэ халлаан Үрүҥ Күнэ аһылла арыллар кэмигэр, Үөһээ Үрдүк Айыылартан сылы-дьылы этэҥҥэ көрсөр, ол ону чөл-чэгиэн туоруур алгыс түһэринэр биир бэлиэ күммүтүн таҕайа, сырса, хайа баҕарар киһини чөрбөтө дьиктиргэтэр сэргэх, бэрт дьикти, аныгылыы арыйыы ааттанан, тыыннаах дорҕоон доҕуһуолун сэҥээрээччилэрэ, сөргүтээччилэрэ бүтүн Саха сирин араас муннуктарыттан мустаннар, талааннаах, тарбахтарынан кылыта, кырыыҥкай кыллары таарыйа таҕайа, табыйан-дарбыйан, дирбиэннээх тэтим тыас үстүрүмүөн доҕуһуоллаах ырыалара-тойуктара Дьокуускай куорат килбэйэр киинигэр – «Туймаада» эти-сиини чэбдигирдэр киэҥ-куоҥ хонуутун түһүлгэтигэр дуорайан, дьиэрэйэн ааста.

Мустубут талааннар саастарынан араастаһыылара да – аҕа уолун кытта курдук саастаахтар, оччугуй оскуола сааһыттан тэгил сааһы хабан, улахан сиппит дьонугар диэритэ – көрөөччүлэри, биһигини, сүрдээҕин сүргэбитин көтөхпүтэ, оонньуур гитаараларыттан бэрт барбах өндөс уолаттар-кыргыттар утуу-субуу, тахса-тахса сүр өрө көтөҕүллүүлээхтик толоруохтаах ырыаларын ис сүрэхтэн иэйэ, ыллыы, оонньуу толортообуттара – бу кырачаан кэнчээри толорооччуларбыт билиҥҥи тэтими баһылыы туппуттара, үөрэтэр уһуйаан, учууталлар кыһамньылаах үлэлэрин түмүгэ буоларыгар кыратык да саарбахтаабаккын уонна кинилэргэ инники өттүгэр өссө ситиһиилээх үлэни, уhуйар умсулҕаннаах үлэҕит уҕараабатыгар баҕарабыт.

«Күн күнэ» диэн дьикти ааттаах тыыннаах дорҕоон доҕуhуол түмсүүтүн иилээн-саҕалаан ыыттылар, бу хайысхаҕа санаатын ууран үлэлиир-хамсыыр ырыа айар, хоһоон суруйар Мэхээс Сэмэнэп-Серкан уонна эдэр эрчимнээх, «Тыыннаах дорҕоон» күөх экраҥҥа биэриитин ыытааччыта Уйбаан Тарааһап. Бу дьон бииртэн биир бөлөҕү хас биирдиилэрин билиһиннэрэ, көбүтэ-көҕүтэ, толоруу түһүлгэтигэр дайытан таһаараллара көрөөччүлэргэ даҕаны, уонна толорооччуларга да буолуо, астык тэтимнээх этэ.

2

Биир бэйэм, дьиҥ иһигэр киирдэххэ диэбит курдук, оонньообут дьон таһымнарын, кыһалла иэйбит толорууларын иһитиннэрэр тыас-уус астыннарбата (кулгаах уһугунан истибитим 40 киловатт күүстээх аппараат турда диэн этэ). Ити аата тыыннаах доҕуһуол оонньуур толорор тыаһын-ууһун аппаратууратын билигин да баһылыы иликпитин туоһута буоллаҕа. Тыыннаах толоруу, ол эбэтэр гитааралары, барабааны, онтон да атын үстүрүмүөннэри тэҥҥэ хомуйа тутан бииргэ оонньуур, ыллыыр хайысхаҕа (ВИА), өһүргэһэ суох, кыаллыбата. Ол эбэтэр тарбахха баттанар эрэ дьон иилиир-саҕалыыр курдуга илэ миэхэ өйдөммөттүҥү курдук. Сыанаҕа толорор дьоҥҥо мониторнай эрээт аҕыйаҕа, толорор үстүрүмүөннэрин уопсай кэриҥин истиспэттэрэ толору дуоһуйууну биэрбэтэ, аһылла арыллан толоруу туругун туппатылар диэн мин бэйэм ис санаабар итэҕэйэбин. Таарыйа даҕата эттэххэ, ааспыт 2017 сыл сайыныгар Үөһээ Бүлүүгэ «Манчаары оонньууларыгар» тиһэ ыытыллыбыт «Хотой Айыы» этно-рок бэстибээлгэ ньиргийбит тыас-уус таһымыгар тиэрдибэтим диэн мин сыаналаатым.

1

Кэнники кэмҥэ бу тыыннааах толоруу араас хайысхалаах истииллэргэ толоруу таһыма лаппа тубуста. Инники диэкки талаһыы, чыпчааллары дабайыы балысхан сыыдамнык барара истээччилэри, биһигини сэргэхситэр. Бу ситиһиилэри толоруу умсугутуулаах уххана тыыннаах доҕуһуол хайысхаҕа ыытыллар күөн-күрэстэри иилээн-саҕалаан ыытар киин улуустарбыт, ол да курдук, кытыы улуустар эмиэ, тэрийэн-бэрийэн ыытар көх үлэһиттэригэр махтаныах кэриҥнээхпит. Билиҥҥи сылбырҕатык сайдар кэм нэмнэрэ эдэр ыччаттарбыт тыыннаах толоруу эйгэтигэр ис сүрэхтэн санааларын ууран дьарыктаналлара элбэх эрэли үөскэтэр, бу хайысхабыт кырдьан, сүтэн хаалбатыгар эрэннэрэр.

3

Толорооччу ырыаһыкка, ол эбэтэр, ыллыыр-оонньуур сиппит бөлөххө, бэйэтин ис дьиҥин көрдөрө кэрэхсэтэр анал толоруу ырыалардаах буолара, буолуохтааҕа наадалаахха дылы элбэх. Көрөөччү иннигэр бэйэҕин билиһиннэрэ ыллыы тахсаргар ити мин тус санаабынан, бөлөх, ырыаһыт төрөөбүт дойдутун отун-маһын туругурда, сиэрдээн-туомнаан толорор ырыалаах буолара – ол харысхал дьайыылаах буоларыгар бигэтик мин итэҕэйэбин, Сырдык кынаттаах санаалаах, дьиҥ сахалыы ыралаах тыллаах, инникигэ эрэллээх толоруута – ол бэйэ ис кыахтааҕын көрдөрө аһарыгар саарбахтаабаппын. Сиргэ-дойдуга, ийэҕэ-аҕаҕа, таптыыр-ымманыйар дьиэ кэргэҥҥэр тапталгын туойарыҥ ыраас далбарга эрэли эрэннэрэр, ол онно бэриниилээҕин биллэрэ иэйэрэ – инникилээҕин кэрэһилиирэ сиэрдээх диэн эрэнэбин. Итини тоҕо аҕынна диэн буоллаҕына, маннык улахан бэйэ оонньоон толоруу түмсүүгэ бэрээдэк сиэрин-туомун толорууга ситэри буолуохтааҕа ордук курдук. Кэлэр өттүгэр ортотунан үстүү тус ырыалаах буолалларын ирдиэххэ диэн мин санаабын этинэрим саарбахтаммат ини...

4

Аныгы толорооччуга ааспыт аҕыс уонус сыллар ааһыыларын, тоҕус уонус саҕаланыыларын саҕанааҕы тыл амтаннааҕынан, дьүрүскэн нүһэринэн толоруу сыта-сымара суоҕар биир бэйэм астынарбын биллэрэбин уонна бу толоро тахсыах, салгыны хамсатыах иннинэ улахан Алгысчытынан аан астарбыттара ааныттан махталлаах быһыы. Толорооччулар хайа быспыт аҥаардара – оскуола саастаах кыра оҕолор бөлөхтөрө. Онон, ити курдук бэйэ-бэйэҕэ харыс сыһыанынан бэрэлэһэ, алгыһынан алкыйса, тыыннаах дорҕоон сайдарыгар баҕарыллар. Таһымнаах, күөн сылдьар улахан бөлөхтөрбүт, тыыннаах толоруу маастардара, бу эдэр дьону үөрэтэ-көҕүтэ, көбүтэ сылдьаллара уруйданар-айхалланар. Киһи киһиттэн үөрэнэр, бэл, гитаараны хайдах сүгэн турарга, тутан оонньуурга даҕаны толорор, үрдүк түһүлгэҕэ туттан турарга тиийэ.

5

Кэмэ атын буолан дуу, ыһыахтар сыбардара буолан дуу, көрөөччү түһүлгэҕэ аҕыйаҕа биир бэйэбин сүрдээҕин сөхтөрдө. Туох кистэлэй – билигин тыыннаахтыы толорооччу иэйиитин толору саалаҕа биэрэр үөрүүтүн муҥутуурун билэ илигин этэ-тыына билиниэҕиҥ. Истээччи да өттүттэн бу кэрэ дьүрүскэнтэн күүhү-уоҕу ылары, ол ону толору билбэтин, хайдахтаах курдук сүр күүс хамсыы, тыына мөхсөрүн кэлэн көрбөтүн-истибэтин кыратык мин өйдөөбөппүн. Бу тыыннаахтыы толорооччу үстүрүмүөннэрин да сыччах аҕалан холбоноро элбэх сыраны, мындыр толкуйу эрэйэр. Ити курдук элбэх дьарыктаныы кэнниттэн тахсан оонньонор. Онно ырыа алыбын истээччилэригэр иhирэхтик толорууга элбэх көрөөччү муhуннаҕына туохха да тэҥнэммэт сүдү дуоhуйууну, сүргэ көтөҕүллүүтүн биэрэр да буоларыгар толорооччу да, истээччи да толору итэҕэйэр. Эдэр, эрчимнээх, хомоҕой хоhоонноох, көтүүлээх-түhүүлээх талба талаан тарбах таарыйа, даҕайар дьүрүскэн тыаhа доҕуhуолу, ол онтон күннээҕи олоххо күүс ылар сүдү кэмин ситэри билэ иликпитин бу буолан ааспыт «Күн күнүгэр» түмсүү кэннилэриттэн билинэ саныыгын.

6

“Ырыа диэн тугуй?” диэн ыйытыгы хас биирдии оҕо, улахан да киһи туруору соҕус кыбыстыбакка ыйытыан сөбө буолуо, ис дьиҥин билбэккэ. Мин санаабар, киһи ис туругун көрдөрөр айылҕабыт анабыла буолара буолуо. Бу санаабын да ыбылы итэҕэйэн, бэл, ыйыппыкка да, саарбахтаабакка да, “Ырыа диэн – Олох” диибин. Кырдьыга да, “Ырыа – олох аргыһа” диэн мээнэҕэ этиллибэтэх сүрдээх мындыр тыллары, өбүгэ саҕаттан хаалбыты, билиҥҥи кэмҥэ диэри түөрэ бары тутта сырыттахпыт. Дьиэ кэргэн олоҕо, иһирэх ырыа курдук сааһыланан, хас биирдии нуотатын алтыһыылара табыллан аттарылыннаҕына табыллар диэбит курдук. Ол дьоллоох дьиэ кэргэн уйата буоларыгар саарбахтаабаккын. Бастакытынан, хотун ойоххунаан эбэтэр тойон эргинээн тапсыыҥ, ол онтон төрөөбүт оҕолоруҥ гармонияларын айан таһаарыыҥ – дьэ бу буоллаҕа ырыа диэн. Хайа, уонна алтыһар дьоҥҥунаан, туттар да сэптэргинээн, малларгынаан тапсыыҥ – маны эмиэ ырыа курдук диэбэтэххэ сатаҕай санаа буолуо. Дьэ, бу курдук бэйэм санааларбын этиммит бичикпин тиһэ, бу тыыннаах доҕуһуол, дорҕоон сүгүрүйээччилэригэр, тэрийээччилэригэр чөл этэҥҥэ буолууну, «Күн күнэ» диэн бэрт дьикти, дириҥ ис хоһоонноох ааттанан талба талааннаахтары биир түһүлгэҕэ муспут тэрийээччилэргэ барҕа махталы этэ, кэлэр өттүгэр килбиэннээх ситиһиилэри баҕара сурукпун түмүктүүм.

Дмитрий ПОТАПОВ, Ньурба.

 

“Дорҕоон дойду” төрүттэммитэ үс сылыгар аналлаах “КҮН КҮНЭ” түһүлгэҕэ кыттыбыт бөлөхтөр

 8

ОҔОЛОР

  1. 1. “Сатал”, Мэҥэ Хаҥалас, Ороссолуода

Быыкаа уолаттар хас кыттыбыт күрэстэрин, бэстибээллэрин аайы дьону үөрдэллэр. Кинилэри музыканнар бары “шоуменнар” диэн ааттыыллар. Ол курдук бэйэлэригэр дьону тардар сырдык эниэргийэлээхтэр. Куонкурустарга сылдьан көрдөххө, уолаттар сыл аайы сайдан, туспан иһэллэрэ харахха быраҕыллар.

Ударнай, вокал – Данил Павлов

Бас-гитара, вокал – Герасим Соловьев

Клавиша – Арсений Заровняев

Гитара – Айаал Константинов

Салайааччы – Ньургустаан Попов

  1. 2. “Чысхаан”, Горнай, Орто Сурт

Горнай улууһугар хас да тыыннаах бөлөх баар. Холобур, Маҕараска уонна Орто Суртка. Орто Суртан Алексей Вензель салайааччылаах “Чысхаан” бөлөх биир да күрэһи көтүппэккэ кэриэтэ кыттар. Быйыл лаппа сайдыбыттара харахха быраҕыллар.

Вокал – Айыллаана Суханова, Саина Григорьева

Бас-гитара – Чысхаан Шамаев

Клавиша – Уруйдаана Чемезова

Ударнай – Роберт Александров

Салайааччы – Алексей Вензель

  1. 3. “Эрэл”, Бүлүү, Чинэкэ

Урут “Чинэкэ” бөлөх хас “Табык” аайы кэлэн кыттан барара. Кинилэр биир саамай биллибит ырыалара – “Эрэл”. Онон, Бүлүү Чинэкэтигэр оҕолору тыынаах доҕуһуолга уһуйар Прокопий Воронов бөлөҕөр “Эрэл” диэн ааты иҥэрбитэ – убайдарыгар ытыктабыл бэлиэтэ.

Соло-гитара – Илья Иванов

Ритм-гитара – Михаил Николаев

Бас-гитара – Егор Корякин

Ударнай – Александр Корякин

Клавиша – Прокопий Воронов

Вокал – Владимир Орлосов

Салайааччы – Прокопий Воронов

9

  1. 4. “Кустук”, Хатас

90-с сылларга киэҥник биллибит айар ырыаһыт Николай Андросов Хатаска уччуталлыаҕыттан, икки тыыннаах бөлөҕү иитэн таһаарда. Улахаттара – “Ситим” бөлөх – элбэх куонкуруска миэстэлэспиттэрэ, музыканнара “бастыҥ” аатын хаста да ылбыттара. Оттон бүгүн Николай Андросов кыраларын – “Кустук” бөлөҕү аҕалла. Бөлөх былырыын тэриллибитэ уонна бэлиэр хас да бэстибээлгэ кытынна.

Ударнай – Сема Николаев

Гитара – Алеша Иванов

Бас-гитара – Тимур Слепцов

Клавиша – Арылхан Корякин

Вокал – Сайдам Поротов

Вокал – Сарыал Иванов

Салайааччы – Николай Андросов

10

  1. 5. “Кынат”, Хаҥалас, Нөмүгү

Айылҕаттан күүстээх санаалаах Пал Палыч Яковлев Хаҥалас Ой нэһилиэгэр оҕолору тыыннаах музыкаҕа уһуйар. Ону таһына сыл ахсын дойдутугар “Ой дуораана” диэн бэстибээли тэрийэр. Быйылгы күрэскэ манна 20-тэн тахса бөлөх кыттыбыта. Мантан улахан аҥаара – оҕолор бөлөхтөрө. Бүгүн Пал Палыч икки бөлөҕүн оонньото аҕалла.

Вокал – Артем Тимофеев

Соло-гитара – Карина Трофимова

Ритм-гитара – Егор Чичахов

Бас-гитара – Дьулусхан Петров

Ударнай – Кристина Могусова

Салайааччы – Павел Яковлев

  1. 6. “Ой дуораана”, Хаҥалас, Нөмүгү

“Ой дуораана” – саҥа бөлөх. Урут улахан сыанаҕа буолуохтааҕар, биир да күрэскэ кытта иликтэр. Ол да буоллар, бүгүн атын бөлөхтөрү көрөн-истэн, билии эбинэр баҕалаах Хаҥаластан кэлэн тураллар.

Вокал – Милена Трофимова

Ритм-гитара, вокал – Маша Землянская

Бас-гитара – Саина Адамова

Ударнай – Влада Слепцова

Салайааччы – Павел Яковлев

  1. “Куйаар”, Мэҥэ Хаҥалас, Майа

Вокал, гитара – Арина Васильева

Бас-гитаара – Амина Баишева

Ударнай – Галя Христофорова

 11

  1. 8. “Элдэн суhумнара”, Анаабыр, Үрүҥ Хайа долган нэһилиэгэ.

Саамай ыраахтан кэлбит ыалдьыттарбыт. ЭЛДЭН диэн – долган тыла, сахалыыта – ДЬҮКЭЭБИЛ. Бөлөх салайааччыта Сергей Сыроватскай “Мичилий” диэн хит ырыатын билбэт киһи аҕыйах буолуохтаах. Сергей аҥаардас эстраданан муҥурданан хаалбакка, тыыннаах доҕуһуолга оҕолору да, улахан дьону да уһуйар. Холобур, Анаабыр Үрүҥ Хайатыгар “Элдэн” диэн улахан дьон бөлөҕө баар. Оттон бүгүн бу оскуола оҕолорун илдьэ кэллэ.

Вокал – Аня Туприна, 3 кл.
Гитара – Мичил Туприн, 11 кл.
Бас-гитара – Владислав Сыромятников, 8 кл.
Клавиша – Мираида Туприна, 8 кл.
Ударнай – Сайаана Попова, 8 кл.

Салайааччы – Сергей Сыроватскай.

  1. 9. “Тумат”, Усуйаана, Тумат

Усуйаана ыраах улуустан, Тумат курдук сир түгэҕэ дойдуттан анаан-минээн “КҮН КҮНЭ” түһүлгэҕэ кытта кэллилэр. Урут улахан сыанаҕа тахса иликтэр. Бөлөх 2017 сыл ахсынньы ыйыгар саҥа тэриллибитэ. Бу аҕыйах ый иһигэр урут гитаара диэни илиилэригэр тутан көрбөтөх оҕолор бэлиэр балайда таһымнаахтык оонньуур буоллулар.

Ритм-гитара – Герман Горохов, 9 кл.

Соло-гитара – Александр Томскай, 6 кл.

Бас-гитара – Петр Колёмов, 8 кл.

Клавиша – Иван Горохов, 7 кл.

Ударнай – Любомир Северьянов, 9 кл.

Вокал – Федор Томскай, 9 кл.

Салайааччы – Николай Слепцов

  1. 10. “Сиккиэр”, Сунтаар, Маар Күөл

Бөлөх түөрт сыллааҕыта тэриллибитэ. Онтон ыла Саха сирин араас улуустарыгар ыытыллар бары бэстибээллэргэ ситиһиилээхтик кытталлар. Холобур, Хатаска ыытыллыбыт күрэскэ уонна Мэҥэ Хаҥалас Харатыгар ыытыллар “Сааскы тэтимҥэ” Гран-при аатын ылбыттара. Горнайга “Туллуктар кэлбиттэр”, Бүлүүгэ “Бүлүү добун дорҕооно”, Чурапчыга “Добун дорҕоон түһүлгэтэ” бэстибээллэргэ 1-кы лауреат буолбуттара.

Гитара – Милена Герасимова
гитара – Ася Константинова
Бас-гитара – Дайаана Иванова
Ударнай – Тускулаана Петрова
Клавиша – Елена Эверстова
Вокал – Кристина Саввинова

Салайааччы – Владимир Константинов

  1. 11. “Халлааҥҥа Үрдэл”, Чурапчы, Сылаҥ

Саха сирин музыканнарын да, тыыннаах доҕуһуолу сэҥээрээччилэри да хара маҥнайгыттан улаханнык соһуппуттара. Айсен Борисов бэйэтин төрөппүт уолаттарын музыкаҕа уһуйан, чуолаан тыастаах-уустаах рок-музыкаҕа сыһыаран үлэлии-хамсыы сылдьаллар. Аан бастаан гитаараларын кыайбакка соһон тирилэтэ сылдьар уолаттан билиҥҥи кэмҥэ саамай үрдүк таһымҥа үлэлии сылдьар биир бастыҥ бөлөхпүт буола сайыннылар.

Бас-гитара, вокал – Роберт Борисов

Ударнай – Александр Борисов

Вокал – Гаврил Борисов

Гитара – Антон Борисов

Клавиша – Айсен Борисов

Вокал – Алина Охлопкова

Салайааччы – Айсен Борисов

УЛАХАН ДЬОН

  1. 1. “Байҕал”, Дьокуускай

“Дорҕоон дойду” айар лабораторияҕа үөскээн, үүнэн-сайдан тахсыбыт бөлөх. Хоту дойду уолаттарын аан бастаан Дмитрий Готовцев түмпүтэ, үөрэппитэ-такайбыта. Уолаттар билигин ыҥырыкка сылдьар буоллулар. Ол курдук, аҥаардас быйыл Ника, Кулуһун уонна Кынат, Алексей Потапов, Анастасия Готовцева кэнсиэрдэригэр доҕуһуоллаатылар. Урут Айыллаана Семенова-Айыллаана Чолбон “Байҕал” доҕуһуолунан ыллаан “Үрдэл” бириэмийэни ылбыттаах. Оттон Анна Слепцова-Анна Байҕал – саха музыканнара бары сөҕө көрөр ырыаһыттара.

Ударнай – Дмитрий Корякин

Гитара – Василий Дьячковскай

Гитара- Мичил Мекумянов

Бас-гитара – Сергей Слепцов

Клавиша – Александр Раздьяконов– Резкий

Вокал – Кулуһун уонна Кынат

Вокал – Анна Слепцова

Салайааччы – Дмитрий Корякин

 

2.“Дапсы”, Дьокуускай

90-с сылларга, тыыннаах музыкаҕа улахан чуумпуруу барбыта. Ол кэмҥэ бу эйгэни “Дапсы” бөлөх сөргүппү улахан үтүөлээх. Саха бастакы идэтийбит вокальнай-инструментальнай ансаамбылын – “Чороону” – салайбыт Георгий Георгиевич Сергучев 1995 сыллаахха Култуура колледжыгар үөрэнэр уолаттартан “Дапсы” бөлөҕү тэрийбитэ. “Дапсы” музыканнара билигин ааттаах-суоллаах, хас биирдиилэрэ үлэлиир эйгэлэригэр ыйааһыннаах дьон.

Ударнай – Леонид Иванов-Лүҥкүр

Гитара, вокал – Иннокентий Гаврильев-Лэкиэс

Бас-гитара – Семен Алексеев

Клавиша, вокал – Константин Слепцов-Кучумаан

Вокал – Бүөккэ Бөтүрүөп, Мэхээс Сэмэнэп

Салайааччы – Иннокентий Гаврильев-Лэкиэс

 

  1. “Олох устун”, Нам

Саха дьоно барыта ыллыыр “Муомаҕа” диэн ырыаларын айбыт Андрей Старков Намҥа олохсуйбута ыраатта. Кини ырыа айарын таһынан, күүстээх гитарист быһыытынан киэҥник биллэр. Онон, кини тула Нам музыканнара түмсэннэр, “Олох устун” диэн ааттанан, бүгүн “КҮН КҮНЭ” бэстибээлгэ кытта кэллилэр.

Соло-гитара, вокал – Юрий Сивцев

Соло-гитара, вокал – Андрей Старков

Ритм-гитара, клавиша, бэк-вокал – Дмитрий Протопопов

Бас-гитара – Станислав Андреев

Ударнай – Александр Шестаков

Салайааччы – Юрий Сивцев

  1. 4. “Амака”, Ньурба

Кэлиҥҥи үс сылга буолбут бэстибээллэргэ улахан тыаһы таһаарбыт биир бастыҥ бөлөх. Хас кыттыбыт куонкурустарын аайы Гран-при аатын ыланнар, билигин кинилэри күрэскэ кытыннарбаттар, ыалдьыт быһыытынан ыҥыраллар. “Амака” өйдөбүлэ – эһэ, тыатааҕы. “Амака” – бэрт аҕыйах буолан үрдүк хаачыстыбалаах музыканы оонньооһун биир бастыҥ холобура.

Ударнай – Геннадий Иванов

Бас-гитара – Манчаары Ксенофонтов

Гитара, вокал – Афанасий Потапов

Гитара – Айсен Кысылбаиков

Салайааччы – Афанасий Потапов

  1. 103 – Хатас, Игорь Капитонов

Бөлөх 2005 с. лоп курдук Дьокуускай куорат күнүгэр Хатаска тэриллибитэ. Хара маҥнайгыттан хас кыттыбыт тэрээһинин аайы туох баар музыканнары улахан сөхтөрөн барбыта уонна элбэх ситиһиилэммитэ. Холобур, былырыын Магадаҥҥа “Золотая лестница” фестивальга бастаабыттара, быйыл эмиэ онно улахан ситиһиилээхтик кыттан кэлбиттэрэ.

Ударнай – Евгений Мегежекскэй

Бас-гитара – Мичил Мекумянов

Вокал – Илья Винокуров

Гитара – Игорь Капитонов

Салайааччы – Игорь Капитонов

  1. 6. “Туман”, Дьокуускай-Майа

Анатолай Босиков-Босс тэрийбит өссө биир бөлөҕө. Быһаас Хаҥаласка ыытыллыбыт “Ой дуораана” күрэскэ бастаан, убаһа ылан тураллар. Бөлөх атыттартан чорбойор биир уратыта – манна скрипканы туһаналлар. Галя Христофорова хас да бэстибээлгэ “бастыҥ инструменталист” аатын ылан турар.

Ударнай – Илья Бурнашев

Гитара – Эллэй Алексеев (+вокальный микрофон на стойке)

Бас-гитара – Семен Окоемов

Скрипка – Галя Христофорова (+инсрументальный микрофон на стойке или петличный инструментальный микрофон)

Вокал, акуст.гитара – Роберт Гаврильев (+di-box)

Салайааччы – Анатолий Босиков-Босс

  1. “Ый Суола”, Дьокуускай-Майа

Бөлөҕү 2007 с. саха рок-музыкатын историятыгар көмүс буукубаларынан суруллан киирбит “Сэргэ” бөлөх салайааччыта Анатолий Босиков-Босс тэрийбитэ. “Ый Суола” – билиҥҥи кэмҥэ саамай үрдүк, идэтийбит таһымҥа үлэлиир бастыҥ бөлөхпүт. Элбэх ырыаһыт кэнсиэрин чопчу “Ый Суолун” доҕуһуолунан ыытар. Холобур, Джидда уонна Күннэй “Истиҥ” диэн бырагыраамалара – толору бу бөлөх доҕуһуола. Утум салҕанар диэбиккэ дылы, билигин бөлөҕү Босс төрөппүт уола Андрей Босиков салайар.


Ударнай – Алексей Ефимов
Гитара – Андрей Босиков (+вокальный микрофон на стойке)

Гитара – Айсен Федоров (+вокальный микрофон на стойке)
Бас-гитара – Семен Алексеев (основной вокал)
Клавиша – Даниил Алексеев

Салайааччы – Андрей Босиков

  1. 8. “Тыыннаах”, Уус Алдан

2005 сыллаахха Уус Алдан Сыырдааҕар “Дапсы” клавишнига Константин Слепцов-Кучумаан улууска баар музыканнары түмэ тардыбыта уонна “Тыыннаах” диэн бөлөҕү тэрийбитэ. Урут араас бөлөхтөргө табыллан оонньообут дьон түмсүбүт буолан, “Тыыннаах” тута музыканнар да, көрөөччү-истээччи да биһирэбилин ылбыта. Бу бөлөх таһаарбыт собус-соҕотох альбомун билигин күнүстэри тымтыктанан да булбаккын.

Ударнай – Артур Свинобоев

Гитара, вокал – Гаврил Свинобоев-Гайаат

Бас-гитара, баян, вокал – Дмитрий Готовцев

Клавиша – Алексей Бережнев

Акуст.гитара, вокал – Константин Слепцов-Кучумаан

Салайааччы – Константин Слепцов-Кучумаан

  1. “Үргэл”, Үөһээ Бүлүү

Аар-саарга аатырбыт “Чолбон” бөлөх ырыаһыта Юрий Васильев-Дьурай тула Үөһээ Бүлүү музыканнара түмсэн, “Үргэл” диэн ааттанан, үлэлии-хамсыы сылдьаллар. Кинилэр оонньуулларын истибит киһи барыта таһымнара үрдүгүн бэлиэтиир. Былырыын Дьокуускай куоракка кэлэн кэнсиэрдээн барбыттара. Ону сэргэ Манчаары оонньууларыгар буолбут “Хотой Айыы” бэстибээли тэрийсибиттэрэ. “Үргэл” – “Чолбону” утумнааччы, үгэһи салҕааччы.

Ударнай – Игорь Сортолов

Гитара – Андрей Иванов-Дьикти

Бас-гитара – Борис Миронов-Мирон Барклай

Клавиша, саксофон – Сергей Иванов-Сэргээчик

Гитара, вокал – Юрий Васильев-Дьурай

Салайааччы – Игорь Сортолов-Сортуол

Тарҕат:

Ырытыы  

Кенvл Кыыс
0 Кенvл Кыыс 10.07.2018 20:10
Тыыннаах доргоон киhи кутун уйулгата хамсаан таhаарар дьин ис эйгэ ыллыыр алыба. Бу доргоон дьону киhини тvмэр биир саамай суолталаага доргоону таhаарар тэриллиин биир турукка киирии. Иитэр еттvнэн ого кэрэни кэрэхсии оту маhы ыллата сылдьарга vерэтэр. Тыыннаах доргоон Хас тыаha хамсаныыта маны хайа да бэйэлээх киhи кэрэхсээбэт буолбатах. Кvн Кvнэ сагаламмыта биhэрибиллээх. Тыыннаах доргоон ере тутар дьон баалларыттан Veрэбин! Оголор дьин чахчы тыыннаах доргоону истэр буолан ылсан оонньууллара бу Vрдvк эрэ сыанабылы ылыан сеп.Кытаатын! Тыыннаах доргоон баарын тухары олох ессе тупсар сайдар. Кvн Кvнэ vvнэ тур!!!
Ответить

Ырытыыгын суруй

Защитный код
Обновить

Бүтэһик сонуннар