Арассыыйаҕа Индия Өрөспүүбүлүкэтин посола Панкадж Саран бу күннэргэ Дьокуускайга кэлиэҕэ. Бу туһунан Ил Дархан уонна бырабыыталыстыба пресс-сулууспата иһитиннэрэр.
Панкадж Саран атырдьах ыйын 1 күнүгэр киэһэ 17 ч. “Сахамедиа” медиа-киинигэр пресс-кэмпириэнсийэни биэриэҕэ. Онно кини Арассыыйа уонна Индия сыһыаннарын туһунан, култуура, экэниэмикэ, бэлиитикэ хайысхатыгар туох сибээстээхтэрин сиһилии кэпсиэҕэ. Маны таһынан, Индия РФ посольствота уонна Индия Владивостоктааҕы консульствота Индия киинэтин бэстибээлин уонна бу дойду классическай үҥкүүтүгэр мастар-кылааһы тэрийиэхтэрэ.
Индия киинэлэрин “Лена” уонна “Киин” кинотеатрдарга атырдьах ыйын 1-3 күннэригэр көрдөрүөхтэрэ. Онно “Инглиш-Винглиш”, “Беги, Милка, беги” уонна “Звездочки на Земле” Болливуд киинэлэрин көрдөрүөхтэрэ. Киинэ бэстибээлин аһыллыытыгар Владивостоктан “Дости” диэн индийскэй үҥкүү бөлөҕө кыттыаҕа. Ол кэннэ кинилэр маастар-кылаас биэриэҕэ. Тэрийээччилэр этэллэринэн, бу тэрээһин барыта буор-босхо ыытыллар.
