Киирии

Киирии

Атырдьах ыйын 30 күнүгэр Саһыл Сыһыы 95 сылыгар анаммыт кэмпириэнсийэҕэ Гражданскай сэрии кэмигэр утарыта турбут күүстэр Иван Строд уонна Анатолий Пепеляев хос сиэттэрэ кытыннылар.strod5

 

Устуоруйаны санаттахха, Аммаҕа 3 аҥаар ый төгүрүктээһиҥҥэ түбэспит кыһылларга көмөҕө баран иһэр Иван Строд хамандыырдаах кыһыл этэрээтин Анатолий Пепеляев генераллаах үрүҥ этэрээтэ аара тоһуйарга сананар. Строд этэрээтэ Саһыл Сыһыыга аара тохтоон сыттаҕына, сарсыарда эрдэ өмүтүннэрэн саба түһүөх буолбуттара, кытыы балаҕаҥҥа сытар кыһыллар элбэх өлүүнү көрсөн туран атааканы тохтоппуттара. 300 киһилээх аармыйа төгүрүктээһиҥҥэ киирбитэ. Строд этэрээтэ олунньу 13 күнүттэн кулун тутар 3 күнүгэр диэри барыта 18 суукка устата утарыласпыта. Балбааҕынан, өлбүт аттарынан, дьонунан кириэппэстэрин бөҕөргүтүнэллэрэ. Туох да аһа, уута суох хаалбыттара. Өлбүт аттарын этин сииллэрэ. Бандьыыттар буулдьаларын быыһыгар тахсан хаар ылаллара. Ботуруоннара, астара бүтэн барбыта. Бааһырбыт саллааттар үгүстэрэ өлүтэлээбиттэрэ. Аччыктаан, бааһыран сэниэлэрэ эстибит саллааттар өстөөх атаакатын хорсуннук турууласпыта. Пепеляев аармыйата манна 150 киһитэ өлбүтэ, бааһырбыта. Кыһыллар көмөҕө икки аармыйаны ыыппыттара.strod4

95 сыл аннараа өттүгэр сэриилэспит утарыта күүстэр удьуордара Саха сиригэр көрүстүлэр. Анатолий Пепеляев сиэнэ, Виктор Пепеляев Ташкентан, Иван Строд сиэнэ, Ольга Русина-Строд АХШ-тан көтөн кэлбиттэр. Хос сиэттэрэ, Игорь Пепеляев Москубаттан уонна Ян Строд Вышний Волочёк куораттан кэлбиттэр.strod2

Амма улууһугар ыытыллыбыт «Иллээх буолууга уһун айан: Саха сиригэр Гражданскай сэрии уруоктара» кэмпириэнсийэни Саха сирин духуобунаһын Академиятын историга, Афанасий Мигалкин ыалдьыттары ыҥыртаан тэрийдэ.strod3

Хаартыскаҕа, ортотугар турар үрүҥ генералын сиэнэ, Виктор Пепеляев кыһыл хамандыырын сиэнин, Ольга Русина-Строду саннытыттан кууһан турар.

Тарҕат:

Комментарии

Защитный код Обновить