Киирии

Киирии

Бу дьыл алтынньы 18 – сэтинньи 4 күннэригэр алмаас арылы кустуга түһэр түөлбэтигэр күүтүүлээх, үтүмэн өрө көтөҕүллүүлээх иэйиини бэлэхтиир тэрээһин – “Настроение” бэстибээл буолаары турар, Мииринэйгэ, Айхалга уонна Удачнайга саҥа, сонун ыалдьыттар кэлиилэрэ күүтүллэр. Быйылгы тэрээһин иннинээҕилэртэн өссө таһыччы тупсуо диэн буолар. Бэстибээл иһинэн барар маастар-кылаастары, күрэхтэһиилэри сэргэ бэрт элбэх, интэриэһинэй күүтэр. Бэстибээли АЛРОСА АХ, ВТБ Кэлим лигата уонна Бүтүн Арассыыйатааҕы үҥкүүлээх успуорт уонна акробатическай рок-н-ролл федерацията тэрийэн ыыталлар.

 

Бэстибээл устуоруйатыттан

Былырыын АЛРОСА уонна ВТБ Кэлим лиигэтин, Бүтүн Арассыыйатааҕы үҥкүүлээх успуорт уонна акробатическай рок-н-ролл федерациятын кытта партнердуу сыһыаннарыгар олоҕуран, баскетбол уонна акробатическай рок-н-ролл сулустара Мииринэйгэ, Айхалга уонна Удачнайга ыалдьыттаан барбыттара. Бүтүн икки нэдиэлэ устата хотугу сир тустаах куораттарын хас да тыһыынчанан олохтоохторо, оҕолоро босхо маастар-кылаастарга дьарыктаммыттара, аһаҕас уруоктарга, быыстапкалаах матчтарга сылдьыбыттара.

Кулун тутар ый бүтүүтэ, муус устар саҕаланыыта Мииринэй куоракка баар “Кимберлит” успуорт дыбарыаһыгар акробатикалаах рок-н-ролл сулустара настаабынныктаах “Кубок АЛРОСА” диэн акробатикалаах рок-н-роллга СӨ официальнай эриэйтиннээх күрэхтэһиитэ бэрт тэрээһиннээхтик ааспыта. Онно Айхалтан, Удачнайтан уонна Дьокуускайтан тиийэ кэлэн, 120-тэн тахса кыттааччы күөн көрсүбүтэ. Күрэс бырагырааматыгар пааранан, ону тэҥэ бөлөҕүнэн үҥкүү эмиэ киирбитэ. Холобур, паркекка формейшн бөлөҕүнэн үҥкүүгэ 8 киһилээх бөлөхтөр бары биир киһи курдук тэбис-тэҥҥэ хамсанан-имсэнэн, астык көстүүнү бэлэхтээбиттэрэ. Идэ­тийбит дьоҥҥо успуорт бу көрүҥэ му­ҥутуур астык көс­түүлээх, ураты умсугутуулаах диэн буолар. Куубак тэрийээччилэринэн үөһэ ааттаммыт Бүтүн Арассыыйатааҕы федерация уонна АЛРОСА буолбуттара.

Быйыл муус устарга “Настроение” бэстибээл чэрчитинэн, алмаастаах түөлбэ үс куоратын олохтоохторо биллиилээх спортсменнар – Олимпиада оонньууларын кыайыылаахтара Михаил Васильевы, аан дойду чөмпүйүөнэ Игорь Григоренконы уонна Арассыыйа элбэх төгүллээх призёра Александр Бойковы кытта биир мууска туран оонньуур, бэйэлэрин күүстэрин тургутунан көрөр кыахтаммыттара. Ыалдьыттар ханнык таһым бэлэмнээхтэриттэн тутулуга суох, баҕалааҕы барытын хабан, интэриэһинэй маастар-кылаастары, аһаҕас уруоктары ыыппыттара. Кэлбит дьон бары бириистээх, бэлэхтээх, үрдүк настарыанньалаах төннүбүттэрэ! Бырайыак партнёрунан Арассыыйа Хоккейга федерацията буолбута.

Ыам ыйыгар Мииринэйгэ “Настроение” бэстибээл тэриллибитигэр олимпийскай спортсменнар кэлбиттэрэ. Сулустар “десаннарын” ортотугар бааллара: Олимпийскай оонньуулар бириистээхтэрэ Сергей Семенов, Давит Чакветадзе уонна Валерия Коблова. Кинилэр оскуола үөрэнээччилэрин кытта көрсүспүттэрэ, автограф түҥэппиттэрэ, оҕолор ыйытыыларыгар хоруйдаспыттара, маастар-кылаастары тэрийбиттэрэ. Успуордунан дьарыктанарга кэтэр көстүүм оонньоммута.

Ол кэнниттэн аны хореография уонна үҥкүү ускуустубатын хайысхатыгар тэрээһин буолбута. Ыам ыйын 23 – бэс ыйын 1 күннэригэр Удачнайга, Айхалга уонна Мииринэйгэ 10-нарыттан 16-ларыгар диэри саастаах талааннаах оҕолору көрүү буолбута. Ол бэстибээлгэ тыйаатыр, киинэ артыыһа, тэлэбиидэнньэ уонна араадьыйа ыытаачыта Яна Поплавская, хореограф, актриса, преподаватель Ольга Насырова ыҥырыллыбыттара. Яна уонна Ольга «Культура детям» диэн Илзе Лиепа аатынан пуонда аатыттан тыйаатыр-хореография шоутугар кытыарарга диэн, талааннаах оҕолору талан барбыттара. Бу оҕолор кыттыылаах турбут шоу премьератын сүрэхтэниитэ ахсынньы ыйга үгэс буолбут саҥа дьыллааҕы баалга буолара былааннанар. Ону сэргэ ыалдьыттар Хара муора кытылыгар түстэммит Гурзуфка баар аатырбыт “Артек” лааҕырга барар путевканы туттартаабыттара.

Дьүүллүүр сүбэ талааннаахтары талыы кэмигэр ордук 10 саастаах, үҥкүүнэн 5 сааһыттан дьарыктаммыт Карина Данилованы уонна 3 сааһыттан балет ускуустубатыгар сыстыбыт билигин 16-тыгар сылдьар Инна Березоваяны уһулуччу тутан бэлиэтээбиттэрэ. Инна «Алмазы Якутии» кэлэктиибигэр дьарыктанар. Ити кэлэктиип Арассыыйа араас куораттарыгар буолар “Планета искусств” куонкуруска хас да төгүл Гран-при ааты ылбыта, үгүстүк бириистээх миэстэлэргэ тиксэн турар. Ол ыстааһы, талааны идэтийбит дьон тута бэлиэтии көрбүттэрэ.

Nastroenie Octoberfest1

Иэйии күүһэ, буурҕата улаатар

Оттон бу буолуохтаах “Настроение” бэстибээлгэ баскетбол, акробатикалаах рок-н-ролл, брейкданс уонна буги-вуги чаҕылхай сулустара кэлээри ох курдук оҥосто сылдьаллар.

Кинилэрдиин көрсүһүүнү, маастар-кылаастары сэргэ аһаҕас уруоктар, турнирдар буолуохтара. Манна ким баҕалаах, ханнык таһым эрчиллиилээҕиттэн тутулуга суох сылдьар кыахтаах. Кылгас метражтаах киинэлэр, үҥкүү батллара көрдөрүллүөхтэрэ, үөрэтэр көрдөрүүлэр буолуохтара. Оттон муҥутуур тутаах тэрээһин – акробатикалаах рок-н-роллга Саха Өрөспүүбүлүкэтин чөмпүйэнээтэ сэтинньи 4 күнүгэр ыытыллыа. Бары тэрээһиннэргэ сылдьыы, буолаарын курдук – босхо, төлөбүр ирдэммэт!

Баскетболистар Удачнай куоракка – алтынньы 18 уонна 19 күннэригэр, Айхалга – алтынньы 20-21 кк., Мииринэйгэ – 23-24 чыыһылаларга баар буолуохтара. Рок-н-роллааччылар Удачнайга – алтынньы 29-30 күннэригэр, Айхалга – алтынньы 31 уонна сэтинньи 1 күннэригэр, оттон түмүктүүр сырыылара Мииринэйгэ – сэтинньи 3-4 күннэригэр былааннанар. Бу сырыы, өйдөө­бүккүт курдук, рок-н-ролл чөм­пүйэнээтинэн түмүктэниэ. Сиһилии иһитиннэриини vk.com/nastroeniefest киирэн билсиэххэ сөп.

Nastroenie Octoberfest2

Андрей ШИЛОВ,

Дмитрий МИХАЙЛОВ.

Тарҕат:

Ырытыыгын суруй

Защитный код
Обновить

Бүтэһик сонуннар