Алтынньы 13 күнүгэр Санкт-Петербург куоракка акадьыамык Эдуард Карлович Пекарскай төрөөбүтэ 160 сылыгар аналлаах төгүрүк остуол буолан ааста. Бу тэрээһини Санкт-Петербурга баар Саха сирин бастайааннай бэрэстэбиитэлистибэтэ уонна Польша Генеральнай консульствота тэрийэн ыытта.
Тэрээһин Санкт-Петербурга баар Польша Генеральнай консульствотыгар буолан ааста. Төгүрүк остуолга Арассыыйа уонна Польша чинчийээччилэрэ бастакы фундаментальнай саха тылын тылдьытын оҥорооччу Эдуард Карлович Пекарскай билимҥэ үлэтин суолтатын тула кэпсэттилэр.
Санкт-Петербурга баар Польша Генеральнай консула Анждей Ходкевич уонна Саха сирин бастайааннай бэрэстэбиитэлин солбуйааччы Юрий Кравцов тэрээһин аһыллыытыгар эҕэрдэ тыл эттилэр. Саха сирин устуоруйата Польшаҕа сүдү суолталааҕын туһунан Анджей Ходкевич бэлиэтээн эттэ.
Кэпсэтиини К.А. Тимирязев аатынан Москубатааҕы тыа хаһаайыстыбатын акадьыамыйатын дассыана Марфа Бровченко иилээн-саҕалаан ыытта. Чинчийээччилэр акадьыамык Эдуард Пекарскайы үйэтитиигэ аналлаах дакылааттарынан кытыннылар.
Бырагыраама чэрчитинэн, «Польские исследователи Сибири» быыстапка аһыллыыта буолла. Тэрээһин Эдуард Карлович көмүс уҥуоҕар сибэкки дьөрбөтүн ууруутунан түмүктэннэ.
