Дьокуускайга үгэскэ кубулуйбут Олоҥхо декадата “Улуу Кудаҥса” испэктээк бастакы туруоруутунан саҕаланна. Бастыҥ олоҥхоһуттар уонна саха эпоһын сайыннарыыга үлэлэһэр дьон Ил Дархан Айсен Николаевтан наҕараадалары туттулар.
“2005 сыллаахха ЮНЕСКО, Олоҥхо -- киһи-аймах духуобунай баайын уус-уран шедеврэ буоларын биллэрбитэ. Ол кэнниттэн Олоҥхону үйэтитиигэ үгүс үлэ ыытыллынна. Манан тохтоон хаалбакка, Олоҥхону саҥа таһымҥа таһаарарга үлэлэһиэхтээхпит. Биһиги оҕолорбут, сиэттэрбит Олоҥхо философиятын өйдөөн, өрөспүүбүлкэни сайыннарыыга туһаныахтаахтар”, -- диэн Ил Дархан эҕэрдэ тылыгар эттэ.
Оҕолор ортолоругар бастыҥ олоҥхоһутунан, Нам улууһуттан төрдүс кылаас үөрэнээччитэ Айсен Данилов ааттанна.
“Бу ыччат эрэ ортотугар буолбакка, аҕа саастаах дьоҥҥо сэдэх көстүү буолар. Дьаныардаах уонна сүрэхтээх эрэ киһи олоҥхоһут буолар кыахтаах. Мин 2006 сыллаахтан олоҥхонон дьарыктанабын. Олоҥхоһут киһи тойуктуур, чабырҕах ааҕар буолуохтаах. Билигин сиэттэрбин олоҥхоҕо үөрэтэбин. Түгэнинэн туһанан дьиэ кэргэммэр улахан махталбын тиэрдэбин”, -- диэн Чурапчы улууһуттан төрүттээх олоҥхоһут Сусанна Лазарева бэлиэтээтэ.
Декада чэрчитинэн Олоҥхо оскуолатын үөрэнээччилэрэ, “Олоҥхо дойдутун олоҥхоһуттара” уонна “Хабыр киирсиилээх Хабытта Бэргэн» диэн быыстапка туруордулар.
