Бу күннэргэ Сунтаар улууһун делегацията саха култууратын билиһиннэрэр сыаллаах Мексикаҕа сылдьар.
Бэҕэһээ, сэтинньи 29 күнүгэр, делегация айар бөлөҕө сүбэлэһэн баран, саха аатын ааттатаары төрүт таҥаспытын симэнэн Канкун куорат саамай тоҕуоруһар пляһыгар – Дельфиннаах пляжка хотоҕостуу субуллан киирдибит. Былырыын баччаларга, Олоҥхо күнүн көрсө, Сунтаар устун сахалыы таҥнан киирбиппитин олус биһирээбиттэрэ. Оттон атын дойду дьоно, биһигини көрөн отой да ах бардылар.
Манна Светлана Петрова уус-уран салайааччылаах, Антонина Кириллина салайааччылаах "Сунтаар ситимэ" түмсүү тигэн таһаарбыт кыыс уонна уол ыал буолар саха төрүт таҥаһын көрдөрдүбүт. Олохтоох уонна ыалдьыт дьон олус сөҕөн-махтайан үөрүү бөҕө, бэлэмнэнэ таарыйа пляжка киирэн саха фольклорун арааһын иһитиннэрдибит уонна Кураһаай Мэхээлэ оһуокай үҥкүүтүнэн үөрүүлээх күммүтүн уруйдаатыбыт.
Пляжка төһө да сыгынньах сылдьар дьон ортотугар биһиги сахалыы халыҥ таҥаспытын олуонатык көһүннэр, биһиги төһө эмэ киһиэхэ саха диэн норуот баарын билиһиннэрдибит. Бэл диэтэр, Москуба дьоно “биһиги биир дойдулаахтарбыт” диэн үөрэ-көтө, киэн тутта, дьоллоох харахтарынан көрсүбүттэрэ умнуллубат түгэн буолла.
Манна биһиэхэ биир дойдулаахпыт, сахабыт кыыһа Татьяна Корякина автобус булан, бэйэтэ төлөбүрүн оҥорон улахан көмө буолбутугар махталбыт муҥура суох. Салгыы бүгүн сүрүн тэрээһиммит ыытыллар сиригэр – Вальядолид куоракка айанныыбыт.
Мария Кобельянова – Тускулаана