Сэтинньи 30 – ахсынньы 1 күннэригэр Дьокуускайга, “Кыһын Саха сириттэн саҕаланар” бэстибээл иһинэн “Күн табата” норуоттар икки ардыларынааҕы этническэй муода көһө сылдьар бэстибээлэ номнуо үһүс төгүлүн ыытыллар.
Манна Алтайтан, Бурятияттан, Забайкалье кыраайыттан, Монголияттан, Хакасияттан, Казахстантан уонна Дьокуускайтан, өрөспүүбүлүкэ араас улуустарыттан 50 тахса уран тарбахтаах иистэнньэҥнэр, таҥас айааччылар кыттыыны ылыахтара.
Бэстибээли “Симэх” норуот ускуустубатын уонна уус-уран оҥоһуктарын национальнай киинэ уонна А.Е. Кулаковскай аатынан норуоттар доҕордоһууларын дьиэтэ тэрийэллэр.
Бу бэстибээл СӨ култуураҕа уонна духуобунай сайдыыга министиэристибэтин, СӨ тас сибээскэ уонна норуоттар дьыалаларыгар министиэристибэтин, Дьокуускай куорат култуураҕа управлениетын, “Уус” норуодунай-художественай уус-уран оҥоһуктарга СӨ пуондатын, СӨ дизайнердарын сойууһун өйөбүллэринэн ыытыллар.
Тэрээһин сүрүн сыала-соруга – Аан дойдуга үгэс буолбут уонна аныгы истииллээх национальнай көстүүмнэри сайыннарыы уонна киэҥник тарҕатыы.
Быйылгы бэстибээлгэ Москубаттан Раушан Мусахановна Канапьянова, Казахстантан Райхана Капаровна Бакирова, Монголияттан Баянжаргал Баяндуурэн, Забайкалье кыраайыттан Дарима Батомункуевна Жалсанова, Алтайтан Татьяна Борокучуковна Бошкунова, Хабаровскай кыраайтан Валентина Владимировна Белдьы, Калмыкияттан Татьяна Алексеевна Милованова, Бурятияттан Баярма Тумуровна Митупова курдук биллэр-көстөр таҥас айааччылар кыттыыны ылыахтара.
Дьүүллүүр сүбэ састаабыгар киирдилэр: Яна Викторовна Игнатьев, Августина Николаевна Филиппова, Райхана Капаровна Бакирова, Татьяна Алексеевна Милованова, Ариан Арианович Ермолаев, Лидия Афанасьевна Будищева, Надежда Ивановна Докторова, Петр Александрович Винокуров.
Бэрэссэдээтэл: Раушан Мусахановна Канапьянова.
Санатабыт, бастакы бэстибээл 2016 сыллаахха Дьокуускайга буолбута. Манна дойду биэс эрэгийиэниттэн 58 таҥас айааччы кыттыыны ылбыта. “Этно Аксессуар”күрэскэ 27 киһи, оттон “Этно Арт” күрэскэ 8 кыттааччы үлэлэрин көрдөрбүттэрэ. Уопсайа 97 киһи кыттыыны ылбыта.
Иккис бэстибээл Забайкалье кыраайга Агинскай бөһүөлэгэр ыытыллыбыта. Манна Монголияттан, Кытайтан,Казахстантан, Бурятияттан,Забайкалье кыраайыттан уонна Саха сириттэн 14 таҥас айааччы кыттыыны ылбыта.
Сэтинньи 30 күнүгэр Өксөкүлээх Өлөксөй аатынан норуоттар доҕордоһууларын дьиэтигэр, бэстибээл үөрүүлээх аһыллыыта буолан ааста. Манна дьүүллүүр сүбэ бэрэссэдээтэлэ, Москуба куораттан кэлэ сылдьар ыалдьыт, дьүүллүүр сүбэ бэрэссэдээтэлэ Раушан Мусахановна Канапьянова “Бу чахчы интэриэһинэй, сэргэх уонна үс сыл иһигэр дьоһун хардыылары оҥорбут кэскиллээх тэрээһин” диэн эҕэрдэ тылын эттэ. Оттон Өксөкүлээх Өлөксөй аатынан норуоттар доҕордоһууларын дьиэтин дириэктэрэ Яна Викторовна Игнатьева “Бу бэстибээл көмөтүнэн өбүгэлэрбититтэн хаалбыт үгэс буолбут национальнай көстүүмнэри үйэтитэр уонна үүнэр көлүөнэ ыччатыгар хаалларар сыаллаахпыт”, -- диэн бэлиэтээтэ.
Куорат олохтоохторо уонна ыалдьыттара “Күн табата” бэстибээлигэр кэлэн ыалдьыттааҥ, дуоһуйа сынньаныҥ !
