Киирии

Киирии

Саха киинэтин дьон-сэргэ дьүүлүгэр таһаарыы – төрүт култуураны, үтүө үгэһи, төрөөбүт тылы-өһү сайыннарыы биир көрүҥэ.

Кэлиҥҥи кэмҥэ саха киинэтэ сүрдээҕин сайынна. Үүнэр 2019 сылга көрөөччүлэри өссө элбэх сиэрийэлээх биир саҥа киинэ күүтэр. Ол курдук, тохсунньу 9 күнүттэн күөх экраҥҥа, ол эбэтэр, «Саха НКИХ» ханаалыгар «Сүлүһүннээх таптал» диэн киинэ көстүөҕэ.

Киинэ Сардаана Сивцева-Даана Сард сынаарыйынан, режиссёр Елена Эверстова ураты сатабылынан уһуллубут. Киинэҕэ ааспыт 70-с сыллар олохторо-дьаһахтара ойууланар. Киинэни төрүттээччилэр кэпсииллэринэн, сайылыкка икки ыал киириилээх-тахсыылаах, ураты олохторо-дьаһахтара, устуоруйалара кэпсэнэр.

Марина Пермякова, киинэ толорооччу продюсера:

marinf

 –  Бу киинэҕэ 70-с сыллар бүтүүлэрэ көстөр. Уопсайа 16 сиэрийэлээх көстүүнү 1,5 ый устата Чурапчы улууһун Бахсы нэһилиэгэр тиийэн устубуппут. Чахчы, киинэ устуутун сыралаах үлэтигэр бу нэһилиэк олохтоохторо улахан өҥөлөөхтөр. Кинилэр аҥаардас тэрийии, булуу-талыы эрэ үлэтигэр буолбакка, артыыс да быһыытынан холонон көрдүлэр. Онон бу киинэҕэ үлэлээбит хамаанда сайылыкка хонон-өрөөн, ол кэмнээҕи олоҕу этинэн-хаанынан билэн уһуллубуттара ураты суолталаах. Бэлиэтээн эттэххэ, мистика-драма жанрдаах киинэҕэ биллэр-көстөр саха тыйаатырын артыыстара эрэ буолбакка, оскуола үөрэнээччилэрэ уһулуннулар.

Эдэр артыыс, “Айыы кыһата” оскуола 5-с кылааһын үөрэнээччитэ Денис Сивцев киинэҕэ бастакы холонуутун туһунан бу курдук кэпсиир:

denic

–  Мин быһайын сынньалаҥмын олус туһалаахтык атаарбытым. Тоҕо диэтэххэ, баҕа санаам туолан, киинэҕэ уһуллан хааллым. Мин бу киинэҕэ Баанньыска диэн биир ыал оҕотун оруолун толоробун. Киинэҕэ уһуллар саамай ыарахана, эппиэтинэстээҕэ диэн, тылгын нойосуус үөрэтэриҥ эбит. Мин Бахсы оҕолорун, доҕотторбун кытта уһуллубутум. Биһигини кытта Саха тыйаатырын биллэр-көстөр артыыстара бааллара. Бары бииргэ сайылыкка олорбуппут. Мин эбэлээх эһэм ити нэһилиэккэ бааллар, онон хас сайын аайы дойдубар сынньанабын. Биллэн турар, киинэ тахсарын наһаа күүтэбин уонна кыратык долгуйабын. Бииргэ үөрэнэр доҕотторбор номнуо кэпсээбитим. Өссө да киинэҕэ уһуллар баҕалаахпын.

obee

Киинэҕэ Саха тыйаатырын артыыстара Надежда Ушницкая, Дмитрий Михайлов уонна Елизавета Потапова сүрүн оруоллары толордулар. Маны таһынан Ньурбатааҕы драмтыйаатыр артыыһа Майя Слепцова, Уус Алдантан учуутал идэлээх Афанасий Карамзин уонна Бахсы орто оскуолатын үөрэнээччилэрэ Артём Аммосов, Байдам Местников, о.д.а. бааллар.

Екатерина АФАНАСЬЕВА.

Тарҕат:

Комментарии

Защитный код Обновить