Киирии

Киирии

Кырачаан сулус Андрей Николаев-Чаҕыл “Бэлэм буол+” хаһыат бүгүҥҥү ыалдьыта. Олус эйэҕэс, дэгиттэр талааннаах уоллуун ирэ-хоро кэпсэтэн астынным.

– Андрей, дорообо! Ааҕааччыларбытыгар бэйэҥ туһунан кэпсээ эрэ.

– Дорообо. Мин “Айыы Кыһата” оскуола IV “А” кылааһыгар ситиһиилээхтик үөрэнэбин. Ордук математика уруогун сөбүлүүбүн. Киһини толкуйдатар, өйү сайыннарар садаачалары суоттуурбун ордоробун. Үөрэҕим таһынан араас куруһуоктарга, эбии дьарыктарга сылдьабын. Быйылгыттан “Zavod” үҥкүү бөлөҕөр дьарыктанан саҕалаатым. Учууталбыт¾Сергей Сидоров-Серго. Маны таһынан сүүрүүнэн үлүһүйэбин. Дьиэбэр кэллэхпинэ дьоммор көмөлөһөбүн, бырааппын көрөбүн.

RS8A1806

 – Оттон иллэҥ кэмҥин хайдах атаараҕыный?

– Киинэ көрөрбүн сөбүлүүбүн. Фантастиканы ордоробун. Сүрүннээн “Marvel” хампаанньа таһаарар киинэлэрин көрөбүн. Саамай сөбүлүүр киинэм ¾ “Мстители: Война бесконечностей”. Ону таһынан сурунаал, кинигэ ааҕабын.

– Ээ, олус үчүгэй дии. Туох туһунан ааҕаргын сөбүлүүгүн?

– Чопчу бу үчүгэй диэн этэр кыаҕым суох. Кинигэ барыта үчүгэй. Остуоруйалары ааҕар олус интэриэһинэй. Төрөппүттэрим ааҕыыны үрдүктүк туталлар. Онон кыра эрдэхпиттэн кинигэлиин доҕордоһобун. Ааҕар киһи киэҥ билиилээх, дириҥ өйдөөх буолар диэн өйдөбүллээхпин.

IMG 9791

 Ырыа – дууһам иэйиитэ

 

– Чаҕыл, эйигин олох кыра эрдэххиттэн ыллыыргын бары билэбит. Аан бастаан сыанаҕа тахсыбыккын кэпсии түспэккин ээ.

– Бастаан 4 саастаахпар “Саҥа ырыа” күрэскэ Анатолий Горохов ырыатыгар тахсан үҥкүүлээбитим. Онтон аҕам Эрхаан “Сүрэҕим тугу этэринэн” кэнсиэригэр “Кулунчук” диэн ырыабын ыллаабытым. Ол ырыаһыт быһыытынан бастакы сүрэхтэниим этэ. Ити күн олус долгуйбутум. Арай сыанаҕа туран, ырыам тылларын умнан кэбиһиим диэн. Хата, барыта этэҥҥэ ааспыта.

IMG 9355

– Ордук сөбүлээн толорор ырыалааххын дуо?

– Ырыаларбын барытын сөбүлүүбүн.

– Чаҕыл диэн псевдонимын эбит дии. Бу аатыылыныы туспа устуоруйалааҕа буолуо.

– Биирдэ килиип уста сырыттахпытына, Анатолий Горохов: “Уолбутун Чаҕыл диэххэ. Чаҕылыйыа буоллаҕа!” ¾ диэбитэ. Ити түгэнтэн Чаҕыл буолбутум. Ааппын тута сөбүлээбитим. Доҕотторум Андрей даҕаны, Чаҕыл даҕаны дииллэр.

GGWX8700

– Улааттаххына туох үлэһит буолуоххун баҕараҕыный?

– Быраас идэтин баһылыахпын баҕарабын.

– Үүнэр Саҥа дьылга саамай улахан баҕа санааҥ.

– Айар кэнсиэрим этэҥҥэ аастын диэн баҕа санаалаахпын. Түгэнинэн туһанан, барыгытын тохсунньу 6 күнүгэр Сэргэлээх култуура киинигэр күнүс 15:00 ч. айар үлэм биэс сылын бэлиэтиир истиҥ биэчэрбэр ыҥырабын. Кэлиҥ, сылдьыҥ, дуоһуйа сынньаныҥ!

– Чаҕыл, сэргэх кэпсээниҥ иһин махтал!

IMG 9411

Төрөппүт санаата

 

Аркадий Николаев-Эрхаан:

– Андрей кыра эрдэҕиттэн ураты оҕо буолара биллэр этэ. Кини олох кыратыттан сыана кэтэҕэр биһигинниин тэҥҥэ сылдьан, артыыстар олохторун билэ-көрө улаатта. Уолбут олус үлэһит диэтэхпинэ сыыспатым буолуо. Сүрэхтээх буолан, 5 сыл тухары сыанаҕа ыллаата. Дэлэҕэ дьиэтигэр сүүрбэччэ көстүүм ыйанан туруо дуо?! Дьиҥэр, оҕо аата оҕо. Биирдэ-иккитэ ыллаан баран дьарыгын быраҕыан да сөп этэ.Үөрэҕэр олус кыһаллар. Бэриллибит сорудаҕы эппиэтинэстээхтик бириэмэтигэр толорон иһэринэн маладьыас. Кыра эрдэҕиттэн куһаҕаны-үчүгэйи араарарга, бэйэ бодотун көрүнэ, тардына сылдьарга үөрэтэбит. Ситиһиилэриттэн тэҥҥэ үөрэбит. Билигин кэнсиэрбитигэр күүскэ бэлэмнэнэ сылдьабыт. Бу айар биэчэригэр Андрей 10 сыллаах оҕо сааһын биир кэрдиис кэмин түмүктүөҕэ. Ол кэннэ ыллыырын тохтото түһүөхпүт. Интэриэһэ даҕаны, куолаһа даҕаны уларыйар кэмэ кэллэ. Ол эрээри муусуканы дьарык быһыытынан илдьэ сылдьан, гитараҕа, пианиноҕа оонньуурга үөрэниэҕэ.

 Анна ЗАХАРОВА кэпсэттэ

 

Тарҕат:

Комментарии

Саха
0 Саха 25.12.2018 00:00
Редактор суох дуо? Сыыһаҕыт наһаа элбэх дии
Ответить

Защитный код Обновить