Кулун тутар 7 күнүгэр Хомус түмэлигэр, “Кыргыдайтан кынаттанан, дойдубуттан уһуйуллан” диэн Айталина Семенова учууталыгар Михаил Егорович Ивановка анаан таһаарбыт кинигэтин сүрэхтэниитэ буолан ааста.
Михаил Егорович Иванов педагогическай үлэ, тыыл бэтэрээнэ, СӨ үөрэҕириитин туйгуна. 34 сыл устата Кыргыдай нэһилиэгэр учууталынан, салайааччынан үлэлээбитэ, оройуон, олохтоох сэбиэт дьокутаата, бастакы сүһүөх партийнай тэрилтэ сэкирэтээрэ, табаарыстыы суут бэрэссэдээтэлэ этэ. Нэһилиэк дьонун барытын, кыратыттан кырдьаҕаһыгар тиийэ түмэ тардара, үлэҕэ, үөрэххэ көҕүлүүрэ, салайара.
Үлэ кэнниттэн үөскээн тахсыбыт кыанар-кыаммат кыһалҕатын быһаарсыы, үөрүүлээх да, хомолтолоох да кэмигэр бигэ тирэх, өйөнөр эркин, күүтүүлээх сүбэһит буолуу, хайа да салайааччыттан элбэх энергияны, өй-санаа түмүллүүтүн, кэмигэр лоп-бааччы аттаран туруорар сөптөөх быһаарыы ылыыны эрэйэр. Ол сайдам санаа күүрүүтүттэн, элбэҕи иэҕэн эргитэ тутар толкуйтан, ардыгар күлүм гынар үөрүүлээх түгэнтэн, сороҕор саба баттыыр хомолтолоох да түгэнтэн ыанньыйан тахсарын, этинэн-хаанынан, амарах дууһатынан кини бэйэтэ эрэ билбитэ буолуо диэн сылыктыахха эрэ сөп.
Дьыл- хонук аастаҕын аайы кини оҕону иитигэ-үөрэтиигэ, тыа сирин дьонун олоҕун тупсарыыга ордук уопсастыбаннай үлэҕэ умнуллубат бэлиэ суолу хаалларбыта өссө дьэҥкэтик көстөр эбит.
Кини дьон-сэргэ туһугар туох баар билиитин-сатабылын бүүс бүтүннүү ыраастык, истиҥник кэнчээри ыччакка иҥэрбитин, биэрбитин үөрэппит ыччаттара күн бүгүнүгэр дылы махталлаахтык ахта-саныы сылдьаллара, кини аатын үрдүктүк туталлара ол туоһутунан буолаллар. Үтүө киһи үтүөтэ күн-дьыл ааһан истэҕин аайы өссө суолталанан дириҥээн иһэр эбит. Дьиэ кэргэнигэр амарах аҕа, аймах дьонугар аҕа баһылык, нэһилиэгин дьонугар барытыгар эрэллээх эркин, бигэ тирэх, биир дойдулаахтарын мааны махталларын ылбыт, баай ис хоһоонноох олоҕу олорбут дьиҥнээх Киһи Киһитэ, Киһилии Киһи диэн кини этэ! Айталина Петровна бу кинигэтэ Михаил Егорович араас өрүттээх үлэтиттэн биир өрүтүн арыйар. Ол өрүтэ эмиэ кэнчээри ыччакка умнуллубат суолу-ииһи хаалларбытын, үгүс ыччат дьоҥҥо олохторун суолугар улахан олук уурбутун, сахабыт хомуһа Аан Дойду таһымыгар тахсарыгар күүстээх тирэх буолбутун туоһута буолар .
СӨ үтүөлээх артыыһа, “Душа России” судаарыстыбаннай бириэмийэ лауреата, Аан Дойду виртуоз хомусчута, “Айархаан” бөлөх салайааччыта Альбина Дегтярева, аҕатын туһунан маннык ахтар:
“Аҕам үөрэнээччитэ Айталина Петровна Семенова, билигин Чинэкэ музыкальнай оскуолатын учуутала, ийэлээх аҕабыттан хомуска хайдах үөрэммитин туһунан махтал санаалаах кинигэ таһаарда. Аҕам Михаил Егорович Иванов учуутал, үөрэҕирии туйгуна, бэйэтин сүрүн үлэтин таһынан оҕолору уһанарга, хомустуурга, хаартыскаҕа түһэрэргэ о.д.а. дьарыктаабыта. Хайа баҕарар боппуруоска нэһилиэк дьоно бары киниттэн сүбэ-ама ылаллара. Дьонугар-сэргэтигэр барыларыгар тирэх, күүс-көмө буолара. Ону Кыргыдай дьоно, үөрэппит ыччата күн бүгүнүгэр дылы махтана саныыллар, дьиҥнээх киһи киһитэ этэ диэн билигин да ааттыыллар. Үөрэнээччилэрэ кини биэрбит билиитин, ыйбыт суолун тута сылдьалларын Айталина Петровна таһаарбыт кинигэтэ туоһулуур. Бу кинигэҕэ аҕам хомуска уһуйарыгар туттубут ньымаларын туһунан суруллубут. Онон хомус тардыытыгар үөрэтэр учууталларга олус туһалаах кинигэ.
Ийэм Анна Еремеевна Иванова норуот маастара, аҕабар барытыгар күүс-көмө буолан, иккиэн тэҥҥэ сүбэнэн сылдьаллара. Хомуска оонньооһун аҕам дэгиттэр талааннарыттан биирдэрэ этэ. Хайҕал, махтал көрдөөбөккө бэйэтин билиитин, сатабылын ыччакка иҥэрбитин, кинилэр олохторун суолун тускулун булбут махталлаах үөрэнээччилэр истиҥ санааларын этэр кинигэ буолан тахсыбыт”.
Кини аҕатыгар анаан суруйбут хоһоонун Тамара Попова аан бастакытын ырыа гынан сүрэхтээтэ.
Айталина Петровнаны истиҥ ис хоһоонноох кинигэтэ күн сирин көрбүтүнэн бар дьоно, биир дойдулаахтара, үөрэппит оҕолоро эҕэрдэлээтилэр. Баҕа санаа маанытын, махтал тыл бастыҥын анаатылар.
Ааптар ыра санаа оҥостон сүрэҕэр-быарыгар өр кэм иитиэхтээн сылдьыбыт санаата олоххо киирэн, дьоҕус эрээри олус дириҥ суолталаах, баай ис хоһоонноох дьоһун кинигэтэ тахсарыгар күүс-көмө буолбут “Спектр+” тэрилтэҕэ уонна хатыҥнаах Халбаакы уолугар, оройуон сэбиэтин дьокутаатыгар Василий Мандаровка улахан махталын тиэрдэр.
