Бүгүҥҥүттэн саҕалаан Туймаада туонатыгар Сунтаар улууһун күннэрэ дирбиэннээхтик саҕаланнылар. Улууска Бэйэ оҥорон таһаарыы сылыгар аналлаах Сунтаар улууһун күннэрэ Дьокуускайга кулун тутар 1 күнүгэр диэри тиһигин быспакка ыытыллыахтара. Бүгүн Өксөкүлээх Өлөксөй аатынан Норуоттар Доҕордоһууларын дьиэтигэр Сунтаар улууһуттан төрүттээх уран тарбахтаахтар айар үлэлэрин билиһиннэрэр “Сунтаар уран оһуора” быыстапка үлэлээтэ. Сиэдэрэй оҥоһуулаах, тупсаҕай тутуулаах араас оҥоһуктары киин куорат олохтоохторо, ыалдьыттара сөҕө-махтайа көрдүлэр.
Альбина Федорова, Сунтаардааҕы Кыыл Уолун аатынан түмэл салайааччыта:
- Бу быыстапкаҕа уопсайа Сунтаартан сыдьааннаах 57 тарбахтарыгар талааннаах дьон үлэтэ-хамнаһа көрдөрүүгэ турда. Төрүт үгэһи билиҥҥээҥи диэри илдьэ сылдьар норуот талааннаахтара оҥорбут үлэлэрэ көрөөччү болҕомтотун ылыан ылла. Маны таһынан, быыстапкаҕа Сунтаартан төрүттээх Андрей Чикачев хартыыналара, Константин Мамонтов муостан оҥоһуктара, ону сэргэ “Уран Саха”, “Жемчуг” тэрилтэ, “Саха айдын” ювелирнай мастарыскыай салайааччыта Николай Потапов сиэдэрэй оҥоһуктара бааллар. Олус таһымнаах быыстапка үс күн устата туруоҕа.
Маны таһынан быыстапкаҕа улуус тыа хаһаайыстыбатын бородууксуйатын оҥорон таһаарааччыларын аһа-үөлэ атыыга хамаҕатык барда. Ураты кэрэ айылҕалаах Кэмпэндээйи тууһа, цеолита былдьаһыкка сылдьар. Быыстапка чэрчитинэн сунтаардыы оһуохай түһүлгэтэ дьиэрэйдэ.
Сэҥээриилэр