Киирии

Киирии

Күн бэҕэһээ ''Тыыннаах автограф'' тэрээһиммит олус бэркэ буолан ааста. Сойууспут 85 үбүлүөйдээх сылын саҕалыыр тэрээһиҥҥэ сүүрбэччэ суруйааччы ааҕааччыларын кытта көрсөн, илии баттааһыннаах кинигэлэри кыайа-хото атыылаһан санаалара бэркэ дуоһуйбут буолуохтаах.

Ол курдук, Наталья Харлампьева, Николай Лугинов, Василий Харысхал, Николай Винокуров-Урсун, Павел Харитонов-Ойуку, Николай Курилов, Елена Слепцова-Куорсуннаах, Иван Иннокентьев, Анатолий Старостин-Сиэн Кынат, Аита Шапошникова, Гаврил Андросов, Елизавета Мигалкина о.д.а. саҥа уонна атыыга номнуо бүппүт кинигэлэрин ааҕааччыга бу эрэ күн таһаардылар. Хас биирдии ааҕааччыга тэрийээччилэртэн, Саха сирин суруйааччыларын Сойууһуттан, кинигэҕэ кыбытар закладка сэмэй бэлэх буолла. Ону таһынан, ааҕааччы сөбүлүүр суруйааччытыгар ыйытыы биэрэрэ, айымньы, уобарас, литература туһунан санаатын үллэстэрэ, ирэ-хоро кэпсэтэрэ кэмнээх буолуо дуо? 

IMG 20190322 WA0008
С.А.Новгородов аатынан ”Бичик” кинигэ кыһата бастыҥ уонна саҥа кинигэлэрин атыыга таһааран, дириэктэр Август Егоров тэрээһиҥҥэ толору сылдьан, ааҕааччылары кытта эмиэ көрүстэ, поэзия күнүгэр анаан кыһа үлэһиттэрэ суруйааччылар хоһоон ааҕыыларын уһуллулар.
Кырдьаҕас ”Чолбон” сурунаал ааҕааччыларын үөрдэн, кэлиҥҥи сурунаалларын чэпчэтиллибит сыанаҕа атыылаан, үгүс киһи кинигэҕэ бэчээттэнэ илик саҥа айымньылары көтөх муҥунан илдьэ барда.

IMG 20190322 WA0010
Дьоро киэһэни суруйааччылар биир бастыҥ чугас доҕотторо, тыл икки, дорҕоон икки сахалыы тэтимин тутааччылар, саха музыкатын саҥа таһымҥа таһаарааччылар — ”Кыл саха”' (салайааччы — Анна Томская-Корякина) бөлөх олус киэргэттэ. Этэргэ дылы, ханнык да тэрээһин хайдах саҕаланар да, оннук барар, оннук салҕанар. Онон, суруйааччылар “Кыл сахаларга”' өрүү махтанабыт, бу судургута суох өй-санаа үйэтигэр кэлэн көмө-тирэх буолалларын, дьон кутун өрүү үөрдэллэрин, санааларын түмэллэрин иһин. Салгыы үгүс көлүөнэ үтүө ыччаты иитэн таһаарбыт, сахалыы саҥа үгүс улахан да, бастыҥ да тэрээһиннэригэр үтүө үгэстэри олохтообут Сардаана Федорова салайааччылаах Арктикатааҕы ускуустуба уонна култуура институт устудьуоннара итиэннэ Физико-техническэй лицей үөрэнээччилэрэ саха уонна нуучча классик суруйааччыларын айымньыларын бэрт сэргэх тэтиминэн, эдэрдии эйэҕэстик аахтылар. Киһи сүргэтэ көтөҕүллэрэ тоҕо да кэбэҕэһэй! Уонна саҥа билсэн эрэр тэрилтэбитигэр, “Офсет”' хампаанньаҕа (салайааччы Дария Скобелева) бу тэрээһини ис сүрэҕиттэн өйөөбүтүн иһин махтанабыт.

IMG 20190322 WA0009
Дьоро киэһэ ыалдьыттара — СӨ Конституционнай суутун бэрэстээтэлэ Александр Ким-Кимэн, СӨ экономикаҕа миниистирэ Майя Данилова, СӨ култуураҕа уонна духуобунай сайдыыга миниистирэ Юрий Куприянов, профессор уонна академик Карл Башарин, “Якутия”' медиа-холдинг генеральнай дириэктэрэ Алексей Чертков ааҕааччыларга анаан түһүлгэбит үрдүк сыанатыттан хоһоон аахтылар, суруйааччылары кытта көрүстүлэр. Маны таһынан, Ил Түмэн бэрэсэдээтэлэ Петр Гоголев эҕэрдэтин сыанаттан норуот дьокутаата Любовь Явловская ааҕан, сойуус салайааччытыгар, народнай поэт Наталья Харлампьеваҕа туттарда. Инникитин да хоһоону өйүүр, литератураны сэргиир-кэрэхсиир бэлиитик, биллэр-көстөр медийнэй дьон элбии турдар.

IMG 20190322 WA0013
Медийнэй дьон диэбиккэ дылы, бу күн анаан-минээн оҥостон кэлэн, сорох түмсүүлэр уонна тэрилтэлэр суруйааччылар кинигэлэрин атыылаһан библиотекаларга бэлэх оҥордулар. Холобур, “Офсет”' тэрилтэ инбэлииттэр дьиэлэрин библиотекатыгар, “Айыы Кыһатын” төрөппүттэрин сүбэтэ — оскуолаларын библиотекатыгар туттардылар. Оттон СӨ экономикаҕа миниистирэ Майя Данилова олохтоох библиотекаҕа 100 электроннай кинигэҕэ сертификат туттарбыта эмиэ туһунан интэриэһинэй түгэн буолла. Бу аһымал хардыы салҕана турдун!  

Дьоро киэһэ биир уратытынан “Саха үҥкүүтэ” ырыаны толоруу флеш-моба буолла. Семен Данилов тылларыгар суруллубут Аркадий Алексеев саха уоһуттан түһэрбэт ырыатын Елена Старостина-Хотун Арылы режиссердаах ХИФУ уонна Инфраструктура технологиятын колледжын устудьуоннара, “Саха саарыннара”' ырыа ансаамбыла, “Дьүөгэлэр” ырыа түмсүүтэ (салайааччы Тая Еремеева), байааҥҥа СӨ үтүөлээх артыыһа Сергей Попов, музыкант Иннокентий Готовцев толорон, дьону кытта ылласта, “Куруһаала”' иһэ саха ырыатынан туола түстэ.

IMG 20190322 WA0011
Ырыаһыт ыалдьыттарбыт СӨ үтүөлээх артыыһа Байбал Сэмэнэп поэт Иван Арбита ырыатын толорон, оттон Елена Старостина-Хотун Арылы “Саныыбын төрөөбүт алааспын” диэн народнай поэт Леонид Попов тылларыгар суруллубут ырыаны толорон уонна хомусчут, “Хомус Аан дойдутааҕы түмэлин” учуонай-сэкирэтээрэ Эркин Алексеев сыыйа тардан хомустаабыта, тыл-дорҕоон иэйиилээх киэһэтин өссө байытан биэрдэ.
Түмүккэ, дьон-сэргэ оһуохайдаан, олус кэрэ куоластаах, Саха сирин үтүөлээх оһуохай этээччитэ Данил Пестряков түһүлгэтигэр түмсэн, үөрэн-көтөн, дуоһуйа астынан тарҕастылар.  Киэһэни Рустам Каженкин уонна Зинаида Архипова салайан ыыттылар.

Рустам Каженкин

Тарҕат:

Комментарии

Защитный код Обновить