“Желанный берег” диэн өрөспүүбүлүкэтээҕи тыйаатыр бэстибээлэ түмүктэннэ. Саха сирин тыйаатыр эйгэтин бастыҥнара өрөспүүбүлүкэ тыйатыраалынай ускуустубатын им бэлиэтэ буолбут оҥочо быһыылаах солотулаах стутуэтканы туттулар.
X-с үбүлүөйдээх бэстибээл ый устата ыытылынна. Кулун тутар ыйы быһа Дьокуускайга, дьүүллүүр сүбэ куоҥкурус испэктээктэрин көрдө. Уопсайа, 11 тыйаатыр кытынна. Кулун тутар 27 күнүгэр Саха тыйаатырыгар бэстибээли түмүктүүр дьоро киэһэ буолан ааста. Манна тыйаатыр эйгэтин бастыҥ режиссеругар, артыыстарга, худуоһунньуктарга о.д.а. “Желанный берег” статуэтканы туттардылар.
Ил Дархан Айсен Николаев тыйаатыр үлэһиттэрин эҕэрдэлээтэ: “Өрөспүүбүлүкэ үрдүнэн 11 тыйаатыр баар. Оройуоннарга 53 норуот тыйаатыра үлэлиир. Бу Саха сиригэр талааннаах артыыстар, режиссердар баалларын, ону таһынан, дьон тыйаатыры сөбүлүүрүн бэлиэтэ буолар. Үгүс туруоруулар Арассыыйа уонна Аан дойду таһымнаах куоҥкурустарга лауреат буолуохтара диэммин эрэнэбин. Тыйаатырдары куруук өйүүбүт, ол эрэн тыйаатыр дьиэлэрэ бары тутулла иликтэр. Бу кыһалҕаны кыах баарынан быһаара сатыахпыт. Тыйаатыр сылыгар кэккэ бөдөҥ эбийиэктэри тутуу боппуруоһугар улахан хардыыны оҥоруохпут дии саныыбын. Мин ону эрэннэрэбин”.
“СӨ үтүөлээх артыыһа” ааты Валентина Иссаковаҕа (Олоҥхо тыйаатыра), Ильяна Павловаҕа (Саха тыйаатыра), “СӨ култууратын үтүөлээх үлэһитэ” ааты Амматааҕа тыйатыраалынай оскуола дириэктэригэр Николай Ксенофонтовка иҥэрдилэр.
Бэстибээл кыттыылаахтарын СӨ култуура уонна духуобунай сайдыы миниистирэ Юрий Куприянов эҕэрдэлээтэ. Быйыл бэстибээл бастакытын федеральнай үбүлээһини ылбытын, биирдиилээн номинациялар кыайыылаахтара харчынан бириэмийэлэнэллэрин уонна айар командировкаҕа баралларын бэлиэтээтэ. Миниистир “СӨ култууратын туйгуна” бочуоттаах бэлиэни Лариса Васильеваҕа (Үҥкүү национальнай тыйаатыра), Екатерина Зоринаҕа, Евгений Кузьминҥа (Нуучча тыйаатыра), Мария Баишеваҕа, Артём Михайловка (Опера уонна Балет тыйаатыра), Дмитрий Слепцовка (Ньурба тыйаатыра), Лена Оленеваҕа уонна Владислав Ивановка (Олоҥхо тыйаатыра) туттарда.
“Тыйаатыр ускуустубатын өйүүрүн иһин” анал бириэмийэни “Агора” баан Саха сиринээҕи салаатын салайааччытыгар Павел Охлопковка, “Тыйаатыр ускуустубатын сайдыытыгар кылаатын иһин” бириэмийэни Саха тыйаатырын дириэктэригэр, Арассыыйа үтүөлээх артыыһыгар Анатолий Николаевка туттарда.
Быйыл бастакытын “Көрөөччү биһирэбилэ” диэн номинация киирдэ. Куоластааһын ysia.ru саайтыгар ыытыллыбыта. Үҥкүү национальнай тыйаатыра ордук элбэх куолаһы ылан сүрүн эрэдээктэр Галина Мозолевкаяттан статуэтканы туттулар.
Үөрүүлээх тэрээһин түмүгэр бэстибээл бэрэсидьиэнэ, судаарыстыбаннай сүбэһит, режиссер Андрей Борисов, Петр I уобараһын кэтэн таҕыста. Кини кэнниттэн сыанаҕа 11 тыйаатыр үлэһиттэрэ бары тахсан көрөөччүнү сөхтөрдүлэр.
“Желанный берег” X-с үбүлүөйдээх бэстибээл кыайыылаахтара:
“Бастыҥ дьахтар оруола (иккис былаан)” — Екатерина Зорина (Нуучча тыйаатыра, “Чайка” испэктээккэ Маша оруола).
“Бастыҥ эр киһи оруола (иккис былаан)” — Степан Федоренко (Нуучча тыйаатыра, “Очи черные” испэктээккэ Дилекторскай, Гусар, быраас оруола).
“Бастыҥ эр киһи оруола” — Павел Колесов (Олоҥхо тыйаатыра, “Ала Булкун” испэктээккэ Ала Булкун оруола).
“Бастыҥ дьахтар оруола” — Венера Федотова (Опера уонна Балет тыйаатыра, “Корсар” балетка Медора оруола).
“Көстүүм худуоһунньуга” — Прасковья Павлова (Үүнэр көлүөнэ тыйаатырын “Покуда жива любовь” испэктээк худуоһунньуга).
“Бастыҥ сценография” — Михаил Егоров (Саха тыйаатырын худуоһунньуга).
“Бастыҥ режиссёрскай үлэ” — Сергей Потапов (Саха тыйаатыра, “Мин доҕорум Гамлет” испэктээк).
“Оҕо бастыҥ испэктээгэ” — “Приключения Алисы” (Нуучча тыйаатыра, режиссёр Андрей Габышева).
“Бастыҥ испэктээк” номинацияҕа үгэс курдук үс кыайыылааҕы таллылар:
— “Саха дьахталларын мэтириэттэрэ” (А.Кулаковскай, режиссёр Роман Дорофеев, Олоҥхо тыйаатыра).
— “Корсар” балет ( А.Адана, режиссёр Мария Сайдыкулова, Опера уонна Балет тыйаатыра).
— “Мин доҕорум Гамлет” (У.Шекспир, режиссёр Сергей Потапов, Саха тыйаатыра).
Мария Васильева СИА хаартыската
