Киирии

Киирии

Муус устар 19-24 күнүгэр Ростов-на-Дону куоракка ыччат XVIII Дельфийскэй оонньуулара буолар. Быйыл манна Саха сириттэн 17 оҕо кыттара күүтүллэр. Бэҕэһээ, муус устар 11 күнүгэр СӨ култуура миниистирэ Юрий Куприянов кыттар ыччаты кытта көрүстэ.

Юрий Куприянов оҕолорго үрдүк ситиһиини уонна элбэх доҕоттордоноллоругар баҕарда: “Дельфийскэй оонньууларга Саха сириттэн сыл аайы ситиһиилээхтик кытталлар. Эһиэхэ үгүс өрүттээх ускуустуба эйгэтигэр сайдыылаах буоларгытыгар уонна элбэх оҕолору кытта билсэн эрэллээх доҕоттордоноргутугар баҕарабын”.

Үүнэр көлүөнэ тус сыаллаах пуонда көмөтүнэн быйылгы куоҥкуруска 17-24 диэри саастаах 17 ыччат барыаҕа. Кинилэр П.П. Романов аатынан Дьокуускайдааҕы художественнай училища, балет оскуолатын, В.А. Босиков аатынан Музыка үрдүкү оскуолатын уонна М.Н. Жирков аатынан Дьокуускайдааҕы музыкальнай колледж аатыттан кытталлар. Классическай үҥкүүгэ, дьүһүннүүр ускуустубаҕа, фортепианоҕа, академическай, народнай ырыаҕа уо.д.а. талааннарын көрдөрүөхтэрэ.

Бу оонньуулар дойду талааннаах оҕолорун, ыччатын өйүүр, айар үлэлэрин сайыннаралларыгар сөптөөх усулуобуйаны тэрийэр сыаллаах ыытыллаллар. Номинацияларынан куоҥкурус уонна бэстибээл быһыытынан барыаҕа. Ускуустуба алта көрүҥэ киирэр: толорор, дьүһүннүүр, тылынан, прикладной, социальнай уонна экологическай.

Тарҕат:

Комментарии

Защитный код Обновить