Киирии

Киирии

Уруут-урут, тоҥмут сир ирэрин саҕана, күрээбит күн эргиллэрин саҕана, биир ыалга тоҕус уһун ый уу-чуумпутук ийэтин иһигэр иһийэн сытан баран, ураты кыыс оҕо төрөөн аарыма алааһы биир гына ытаан бэбээрбит.

Оҕо төрөөбүтүгэр таһынааҕы тыалартан, ойоҕостуу ойуурдартан, чугастыы чараҥнартан халлааны хаххалыыр халыҥ көтөр бииһин ууһа кэлэн, ким да хаһан да истибэтэх дьикти доҕоонун, ырыатын-тойугун түһэрбит. Ол кэннэ тыһыынчанан көтөр кынатын тыаһа тус хоту киирэн түһэ турбут. Арай, дьиэ аттынааҕы иринньэх титириккэ үүт маҥан үрүмэ кынаттаах, уот кыһыл күүгэн көҕүллээх кырачаан чыычаах хаалан хаалбыт...

Күн-дьыл күлүмүрдээн ааһан испит, кыыс оҕо улаатан атаҕар турбут. Оҕо барахсан, сүһүөҕэр сүүрээт, өрүү ойуур, тыа диэки талаһара. Кыып-кыра эрдэҕиттэн оту-маһы сэҥээрэн, күҥҥэ-ыйга талаһан, устар былыты батыһан тахсар эбит. Ол тухары кинини от-мас, талах быыһынан үрүҥ чыычааҕа батыһа сылдьара. Тоҕус сааһын томточчу туолар күнүгэр, арыалдьыт чыычаах кыыс көрөн турдаҕына, көстүбэт көй үөһээ халлааҥҥа көтөн тахсыбыт. Киһи хараҕа саатар сырдык халлааныттан кыыс кулгааҕар кинини алҕыыр көрүөхтэн кэрэ ырыа кутуллубут. Ол кэннэ кыыс ытыһыгар үрүмэ үрүҥ куорсун кэлэн түспүт. Бу куорсун кыыска аптаах чыычаахтан бэлэҕэ, үөһэттэн бэриллибит анала, ырыаһыт буолар дьылҕата этэ...

Саха Өрөспүүбүлүкэтин үтүөлээх артыыһа Анастасия Готовцева кэнсиэрэ итинник остуоруйанан саҕаланна. Тобус-толору саала анаан-минээн оҥоһуллубут остуоруйаны сыанаҕа турар улахан экраҥҥа уу- чуумпутук иһийэн олорон көрдө. Оттон экраҥҥа Анастасия аата тахсаатын кытта, сыана уоттара чаҕылыс гына түстүлэр, ону кытта тэҥҥэ үөһээттэн айдарыылаах норуот тапталлаах ырыаһыта илэ бэйэтинэн оҕо сааһын остуоруйатыттан тахсан кэлбиттии илиитин өрө ууммутунан, мичилийбитинэн, үрдүк сыана ортотугар баар буола түспүтэ...

Image11

Анастасия ырыалара самаан сайыны, түптэ унаар буруотун, күөх солко чараҥы, сайылыгы санатар курдук уу сахалыы, намыын ырыалар. Онно кини күүстээх, үөһээ көтүтэр куолаһа сүрдээх үчүгэйдик дьүөрэлэһэн, чахчы даҕаны хараххар күөххэ сууламмыт алаастары, муннугар охсуллубут от сытын, иэдэскэр сылаас сайыҥҥы тыалы илгитэр курдуктар.

Image12

Быйыл ырыаһыт ахсыс айар киэһэтигэр, уратыта диэн, тыыннаах музыка доҕуһуоллаах таҕыста. Эдэр, саҥа биллэн эрэр, ол эрэн бэйэтэ туспа, сахалыы суоллаах “Байҕал» этно-рок бөлөх Анастасия ырыаларын өссө ситэрэн хоторон биэрбитэ олус сонуннук уонна уратытык көһүннэ. Сорох ырыаларыгар биллэр акустик гитарист Герасим Павлов, монгол музыкана Балдорж Хуухэ , виолончелист Саргылана Степанова оонньостулар.

Image13

Анастасия Готовцева быйылгы түһүлгэтэ аныгы кэнсиэрдэртэн уһулуччу атын тыыннаах, сахалыы салгыннаах, үрдүк таһымнаахтык ааста. Улахан хараҕы баайыыта, шоута, үҥкүүтэ-битиитэ, чаҕылхай көстүүмнэрэ да суох буоллар, бу маннык аҥаардас сыгынньах талаан, көмүс куолас бэйэтинэн да үчүгэйин кэрэһилээтэ. Хас ырыа кэнниттэн хабыллар ытыс тыаһа, көтөх муҥунан сибэкки – көрөөччү чахчы даҕаны күннээҕи түбүгүн умнан туран астынан, дуоһуйан барбытын көрдөрдүлэр.

Image15

Кэнсиэр үөһэттэн айдарыы суолтатын, ырыаһыт дьылҕата уратытын, хомойуу хоргутуу сүгэһэрин, үөрүү, дьол күлүмүн, таптал аптаах күүһүн ырыа нөҥүө дьэҥкэтик көрдөрдө.

Image16

PS: Анастасия Готовцева “Дорҕоон дойду” түһүлгэҕэ махтанар. Кини тыыннаах доҕуһуоллаах кэнсиэри оҥороругар “Дорҕоон дойду” түһэ Герасим Павлов, бу түһүлгэни тэрийбит Ресурснай бырайыактыыр киин (дир. М.М. Донской) өҥөлөрө улахан.

 

Люба ГОТОВЦЕВА

Тарҕат:

Ырытыыгын суруй

Защитный код
Обновить

Бүтэһик сонуннар