Киирии

Киирии

Нам улууһугар Олоҥхо Ыһыаҕа буолара биир ый хаалла. Нэһилиэктэр, култуура үлэһиттэрэ, уһанар, иистэнэр талааннаах дьон, куоракка олорор биир дойдулаахтар бары турунан үлэлии-хамсыы сылдьаллар.

Ааспыт нэдиэлэ бээтинсэтигэр Олоҥхо ыһыаҕын тэрийэр өрөспүүбүлүкэтээҕи дирекция үлэһиттэрэ бэлэмнэнии хайдаҕын көрө-истэ Намҥа сырыттылар. Кинилэри Олоҥхо ассоциациятын салайааччыта И.С. Новиков арыаллаан пааркаҕа сырытыннарда. Бу күн ОдьКХ үлэһиттэрэ, Намнааҕы педколледж кэллэктиибэ, биирдиилээн дьон пааркаҕа субботунньуктуу таҕыстылар. Ойуур иһин, ыһыахтыыр түһүлгэ бөҕүн-сыыһын хомуйан, харбаан, чөмөхтөөн, массыыналарга тиэйэн көхтөөхтүк үлэлээтилэр.

5 140

Субуотаҕа улуус баһылыга Юрий Слепцов уонна куратор, СӨ сыана бэлиитикэтигэр судаарыстыбаннай кэмитиэт бэрэссэдээтэлэ Антонина Винокурова, баһылыгы тутууга солбуйааччыта Анатолий Павлов пааркаҕа сырыттылар, дьаһал хаамыытын билистилэр, тутуулары көрдүлэр-иһиттилэр, үлэһиттэри кытта сэһэргэстилэр. 

5 113

Былааннаммытын курдук паарка олорчу саҥардыллыахтаах, элбэх саҥа тутуу ыытыллыахтаах.  Аал Луук Мас, Аар Баҕах сэргэ, Аал уот олоҕо, Моҕол ураһалар, балаҕан, успуорт оонньууларын ураһата, быыстапка павильона, уустар, оһуокай, кымыс, күнү көрсөр, ыччат олоҥхолуур, нэһилиэктэр түһүлгэлэрэ, 3150 миэстэлээх трибуналаах киин түһүлгэ, пааркаҕа суолу оҥоруу уо.д.а.

5 2 1

Тутууга «Уран» ХЭТ (сал. В.В. Яроев), «ССК» ХЭТ (сал. А.М. Ксенофонтов) биригээдэлэрэ, «Диалс бөлөх» ХЭТ (сал. Д.П. Слепцов), «Авангард» ХЭТ (сал. А.Н. Омуков), ИП “В.Р. Марков”, «Норд Икс» ХЭТ (сал. Нь.Дь. Степанов) туос ураһалары, трибунаны, уустар түһүлгэлэрин, быыстапка павильонун, саха балаҕанын, олоҥхоһуттар, суруйааччылар аллеяларын, Киирии Арканы, Аал Луук маһы оҥоро, тута сылдьаллар. Салбаҥныыр суолтан Киирии Ааркаҕа тиэрдэр суол кутуллан, дэхсилэнэн бүтэн эрэр. Уотунан хааччыйыы боппуруоһа быһаарыллыбыт. Саҥа подстанция туруорар соруктаахтар. 

9 2 1

«Кымыс түһүлгэтин», «Аар Баҕах сэргэни» уонна «Ытык Дуоҕаны» ИП А.И. Шадрин оҥоруохтаах, бэлэмнээһин үлэни саҕалаабыт. Тутуу салалтатын, Олоҥхо дирекциятын салайааччылара үлэ гыраапык быһыытынан баран иһэрин эттилэр. “Былааннаммыт тутуу бары ыһыахха диэри ситэриллиэхтэрэ“, – диэн эрэннэрдилэр. 

9 6

Паарканы ыраастааһыҥҥа ЫБММ-лэр, баһаарынайдар эмиэ көхтөөхтүк кытыннылар. Тиэйэр-таһар тиэхиньикэ элбэҕэ буоллар өссө таһаарыылаах, көдьүүстээх буолуо эбит диэн быһаардылар.

5 62

Үлэ элбэх, бириэмэ ыгым. Онон тутааччылар күнү-дьылы аахсыбакка күүскэ турунуохтарын, субуотунньуктар быстала суох тэриллиэхтэрин, көмөлөһө тахсыбыттар үлэлэрэ таһаарыылаах буолуутун ситиһэргэ үчүгэй тэрээһин, хааччыйыы наада.

 И. ИВАНОВ, ulusmedia

Тарҕат:

Комментарии

Защитный код Обновить

Болҕойуҥ ! Чэпчэтиилээх сурутуу саҕаланна!

kyym podpiska