Киирии

Киирии

Бэс ыйын 27 күнүгэр, “Туймаада Ыһыаҕын” көрсө, киэһэ 19:00 чаастан Дьокуускай куорат Доҕордоһуу болуоссатыттан “Дьөһөгөй оҕолоро Айыы аартыгынан” диэн аан бастакытын аттаах дьон параата тэриллиэҕэ.

Параат Арктика уонна хоту дойду ат көлөлөөхтөрүн, сүөһү иитээччилэрин ураты култуураларын харыстыыр, сайыннарар туһугар тэриллэр. Саха норуота былыргы истиэп култууратын тыйыс айылҕалаах хоту дойдуга чөл туруктаах илдьэ кэлбитин ааһан, салгыы сайыннаран, бэйэтэ туспа, ураты култуураны үөскэтэн, аан дойду култууратыгар улахан кылаатын киллэрбитэ. Саха сылгытын боруодата үөскээбитэ.

Бу аахсыйа-параакка өрөспүүбүлүкэ сылгыһыттара, сылгыны иитээччилэрэ, министиэристибэлэр уонна биэдэмистибэлэр салайааччылара, норуот дьокутааттара, биллэр бэлиитиктэр, артыыстар уо.д.а. кыттыахтара.

Тэрээһин Доҕордоһуу болуоссатыгар алгыстан саҕаланыа. Аахсыйаны көҕүлээччилэр эҕэрдэ тыл этиэхтэрэ, Опера уонна балет тыйаатырын хуора “Дьулуруйар Ньургун Боотур” олоҥхоттон “Саргы дьаалы салалыннын” ырыаны толоруо. Ол кэннэ аттаах дьон Доҕордоһуу болуоссата--Ленин болуоссата--Орджоникидзе болуоссата хайысханан сэлэлии хаамыахтара.

Орджоникидзе болуоссатыгар парааттаан тиийбит дьону өрөспүүбүлүкэ Ытык олохтоохторо, үлэ, сылгы иитиитин бэтэрээннэрэ, Саха тыйаатырын артыыстара көрсүөхтэрэ. Хаамыыга кыттыбыттарга кыттыыны туоһулуур сэртипэкээти, “Туймаада Ыһыаҕын” бырагырааматын, өйдөбүнньүк бэлэхтэри туттарыахтара.

Ол кэннэ параат кыттыылаахтара салгыы Үс Хатыҥҥа аттаныахтара.

Бу тэрээһиҥҥэ кыттыан баҕалаахтар маннык аадырыска билсиэххитин сөп: Дьокуускай куорат, Ленин уул. 15 дьиэтэ, киин куорат Култуураҕа управлениета, төл.: 8 (4112) 40-80-82.

 

Тарҕат:

Комментарии

Защитный код Обновить