Айыы Уола – Александр Самсонов аатынан Өрөспүүбүлүкэтээҕи ырыа уонна үҥкүү күөн күрэһэ 10 – төгүлүн төрөөбүт дойдутугар Улахан – Ааҥҥа үрдүк таһымнаахтык ааста. Быйылгы үбүлүөйдээх куонкурус кылаан кыайыылааҕынан нэһилиэк чаҕылхай ырыаһыта Алена Абрамова таҕыста.
Улахан Ааҥҥа ыһыах күн Айыы Уолугар уонна күрэс кыттыылаахтарыгар аналлаах эҕэрдэ кэнсиэр үөрүүлээх быһыыга ыытылынна. Саха эстрадатын ырыаһыттара, хаҥаластар биир дойдулаахтара Роман Данилов – Саргылаан, Иванов Иван – Ванс, Шадрин Рома – Жома, Сандал, Алихан, Сергей Сорокин, Дима Потапов уонна Хаҥалас улууһун «Арчы Дьиэтэ» норуот айымньытын киинин үлэһиттэрэ, мелодист Александр Уваровскай, Лидия Харитонова кыттыыны ыллылар.
Олохтоох дьаһалта баһылыга Олег Валерьевич Иринеев, Айыы Уолун күн – күбэй ийэтэ Марфа Иннокентьевна Самсонова, Александр Самсоновка Айыы Уола ааты иҥэрбит Галина Гаврильевна Федорова, учууталлара Вера Алексеевна Македонова, Лидия Яковлевна Яковлева, Наталья Семеновна Григорьева, Нам Хамаҕаттатын олохтооҕо Саргылаана Петровна Назарова истиҥ эҕэрдэ тылларын эттилэр
Сарсыныгар, сарсыардаттан көрүү – күрэс саҕаланна, балаһыанньа быһыытынан ыччат оҕолор саастарынан арахсан кытыннылар. Кыттааччылар үстүү ырыаны, ол курдук көҥүл тиэмэҕэ ырыаны, Айыы Уолун репертуарыттан, бэйэлэрэ айбыт ырыаларын толордулар.
Көрүү күрэс түмүгүнэн кыайыылаахтарынан ааттаннылар:
Бастакы степеннээх дипломунан наҕараадаланна 11 саастаах Алина Григорьева (Улахан Аан), салайааччыта Айыына Лукина. Лауреаттарынан ааттаннылар: 1 степеннээх 13 саастаах Назаров Максим ( Нам – Хамаҕатта), салайааччыта Станислав Артемьев уонна Ийэ анал бирииһин, статуэтканы ылар чиэскэ тигистэ. 2 степеннээх 10 саастаах Виктория Васильева (Дьокуускай), салайааччыта Александра Сивцева. 3 степеннээх 11 – 14 саастаах оҕолор «Сырдык санаа» ВИА (Нөмүгү), салайааччы Павел Яковлев.
Үҥкүүгэ 1 степеннээх лауреат аатын сүктүлэр « Тэбэнэт» ыччат түмсүүтэ (Улахан – Аан), салайааччы Наталья Бурцева. «Гран – При» чыпчаал бирииһин ылыан ылла Алена Абрамова (Улахан – Аан), салайааччыта Айталина Адамова – Афанасьева, улахан телевизорынан наҕараадаланна. Онон Алена, бу күрэххэ оҕо сааһыттан кыттыбыт сыралаах үлэтэ үрдүктүк сыаналанна.
Кыттыбыт оҕолор олохтоох тэрилтэлэр, улуус култуураҕа салалтатын, «Арчы Дьиэтэ» норуот айымньытын киинин олохтообут бириистэрин ылан үөрүүлэрэ үксээтэ. Нэһилиэк дьаһалтатын үлэһиттэрэ, Валентина Голокова салайааччылаах култуура үлэһиттэрэ тэрээһини үрдүк таһымнаахтык ыыттылар. Ол курдук олус тупсаҕай көрүҥнээх статуэткалары, дипломнары, махтал суруктары өйдөбүнньүк бэлэхтэри анаатылар, нэһилиэк спонсордарын кытта олус көхтөөхтүк үлэлэспиттэр.
Дьүүллүүр сүбэҕэ куонкурус бырайыагын көҕүлээччитэ, бэрэссэдээтэл Лидия Васильевна Харитонова, Саха Өрөспүүбүлүкэтин култууратын үтүөлээх үлэһитэ, хаҥаластар биир дойдулаахтара Галина Гаврильевна Федорова, Нам Хамаҕатта нэһилиэгиттэн саха-французскай лиссиэй учуутала Саргылаана Петровна Назарова үлэлээтилэр
Түмүктүүр дьоро киэһэҕэ Айыы Уолун ийэтэ М.И. Самсонова от ыйын ортотугар оҕотугар аналлаах пааматынньык аһыллыытыгар ыҥырда.
Бу күрэс айар талааннаах оҕолорго аналлаах буолан, рекламата киэҥ хабааннаахтык барбыта. Ол да үрдүнэн, быйылгы күрэскэ олус аҕыйах оҕо кытынна, атын үҥкүү кэлэктииптэрэ кэлбэтилэр.
Лидия Харитонова, ulus.media
