“Мин үрдүбэр күн хаһан да киирбэт” диэн Любовь Борисова киинэтэ Алтайскай кыраайга Барнаул куоракка буолар, “Нравственность есть правда” диэн бүтүн Арассыыйатааҕы XXI Шукшинскай киинэ бэстибээлигэр кыттар. Ону таһынан, Башкирияҕа уонна Иркутскайга буолар бэстибээлгэ кыттара былааннанар.
Бу бэстибээлгэ уопсайа 10 киинэ киирбит. Түмүгүн от ыйын 27 күнүгэр биллиилээх киинэ режиссера, суруйааччы Василий Шукшин дойдутугар Сростки диэн бөһүөлэккэ биллэриэхтэрэ. Бэстибээл кини аатын сүгэр. Оттон сабыллыыта Пикет хайаҕа ыытыллар. Манна биллиилээх режиссер пааматынньыга турар. Дьүүллүүр сүбэ бэрэссэдээтэлэ киинэ устуоруйатын үөрэтээччи Валерий Фомин.
Ону таһынан, киинэ Уфаҕа буолар “Серебряный Акбузат” уонна Иркутскайга ыытыллар “Человек и природа” бэстибээллэр конкурснай бырагырааммаларыгар талыллыбыт. Башкирияҕа “Тойон кыыл” диэн Эдуард Новиков киинэтэ эмиэ кыттар.
