Бу сылга өрөспүүбүлүкэ “Култуура” национальнай бырайыак чэрчитинэн 172 мөл солк ылыаҕа. Култуура министиэристибэтэ быһаарбытынан бу үп тыа сиригэр баар икки кулууб дьиэтин тутууга, муусука оскуолаларын наадалаах тэрилинэн хааччыйыыга уонна модельнай библиотекалары тэрийиигэ туттуллар.
“Көрүллүбүт үбүнэн муусука инструменнара, анал кинигэлэр уонна оҕо ускуустубатын аҕыс оскуолатыгар, Дьокуускайдаҕы муусука кэллиэһигэр миэбэллэр ылыллыазтара”, – диэн култуура миниистирин солбуйааччы Владислав Левочкин эттэ.
Горнай улууһун Дьиикимдэ уонна Уус Алдан улууһун Сыырдаах нэһилиэктэригэр култуура дьиэлэрин тутууга 116 мөл солк курдук үп ыытыллар.
Ону таһынан, түөрт муниципальнай тэриллиилэр 5 мөл солкуобайдаах киинэ көрдөрөр тэриллэри ылыахтара. Саҥа киинэ тыйаатырдара Баатаҕайга уонна Орто Халымаҕа арыллыахтара. Оттон Бэрдьигэстээххэ уонна Бүлүүгэ баар киинэ сааллара саҥа тэрилинэн хааччыллыахтара.
“Модельная библиотека” диэн бырайыак чэрчитинэн Нерюнгри оройуонун Беркакит нэһилиэгин библиотекатын пуондата уонна тэрилэ саҥардыллыа.
“Култуура” национальнай бырайыак үөрэхтээһиҥҥэ, ол эбэтэр исписэлиистэри бэлэмниир куурустарга тирэх буолар. Учууталлар үөрэхтээһин федеральнай кииннэригэр эбии үөрэниэхтэрэ, дистанционнай куурустары туһаныахтара эбэтэр ыҥырыылаах преподавателлэр семинардарыгар сылдьыахтара.
