Киирии

Киирии

Бүгүн, атырдьах ыйын 14 күнүгэр саха норуодунай поэта Леонид Попов төрөөбүтэ 100 сылын туолар.
 
Атырдьах ыйын 13 күнүгэр Сунтаар улууhуттан соҕотох норуот бэйээтэ Леонид Андреевич 100 сылыгар аналлаах,  бэйээт төрөөбүт үөскээбит сиригэр Харбаҕа, айан экспедиция тэрилиннэ. Экспедиция кыттыылаахтарынан Л.Попов аатын сүгэр оскуола учууталлара, үөрэнээччилэрэ, нэhилиэк олохтоохторо, поэт аатын сүгэр Сунтаардаа5ы киин библиотека, телевидение, "Саха сирэ", "Сунтаар сонуннара" хаhыат үлэhиттэрэ буоллулар.
popov1
Айан Хаппыыста буолатыттан саҕаланна. Оскуола иитэр үлэҕэ саабыhа Н.К.Петрова Поповтар олорбут сирдэринэн үhүс экспедиция саҕаламмытын туhунан эппитин кэннэ, сатыы айаҥҥа туруннубут. Ойууртан дьөhөгөй оҕото,  үүт маҥан сылгы тахсан кистии-кистии айхаллаан атаартыы хаалла. Кэлбит ыалдьыттарбыт хаартыскаҕа түhэрдилэр, "айаммыт табыллар буолла",-  диэн үөрдүлэр.
 
Бастакы тохтобулбут "Кутурҕан томторо" диэн сиргэ буолла. Надежда Кузьминична сэрии алдьархайын туhунан, тыылга хаалбыт элбэх киhи аччыктаан, ыалдьан өлбүттэрин биир ииҥҥэ көмпүттэрин туhунан кэпсээтэ. Манна нэhилиэк, Сунтаар бочуоттаах олохтооҕо, алмаас хостооhунун бэтэрээнэ Игнатьев Николай Иванович өйдөбүнньүк бэлиэни туруорбутун эттэ. Биир мүнүүтэ саҥата суох кэриэстэбил буолла, о5олор сибэкки дьөрбөтүн уурдулар.
popov4
Иккис тохтобул Хаhарбалаахха Поповтар кыстык сирдэригэр буолла. Манна киирэргэ сүүhүгэр маҥан тууhахталаах хара ат ыраахтан тоhуйан күүтэн турбута эмиэ айан кыттыылаахтарын болҕомтотун тарта. Тохтобулга хаартыскаҕа түhүү буолла. Салҕыы айаннаан поэт төрөөбүь алааhар Харбаҕа тиийдибит. Олохтоох дьаhалта баhылыгын солбуйааччыта Галина Прокопьевна, нэhилиэкпит историятын элбэх кинигэ тиспит бэтэрээн учуутал Татьяна Алексеевна - Күннээх, Харбаҕа о5о сылдьан өр олорбут Евгений Евсеевич эрдэ тиийэн кулуhун оттон, туптэ оҥорон сыт-сымар таhааран көрүстүлэр. Татьяна Алексеевна Уөhэ Aйыылартан атыҥырыы көрбөттөрүгэр көрдөhөн арыылаах алаадьынан, кымыhынан айах тутан көрдөстө. Ол кэнниттэн архыып улэhитэ Аркадий Егорович, оскуола учуутала Елена Прокопьевна, "Саха сирэ" хаhыат корреспондена, Россия суруйааччыларын чилиэнэ, үөрэппит оҕобут Ангелина Васильева, Л.Попов аатын сүгэр кииннэммит библиотека директора Изабелла Ивановна, бэйээт аймахтара Екатерина Эдуардовна, Илья Алексеевич, Галина Прокопьевна, Татьяна Алексеевна ахтыылары оҥордулар, тыл эттилэр. Надежда Юрьевна үөрэппит  оҕолоро, төрөппүттэрэ бэйээт хоhооннорун аахтылар.
popov3
Сынньалаҥ биллэриллэн күөстэн сыалаах эт бө5ө хоторуллан, ас-үөл бө5ө тэлгэнэн, бөтүөн муҥунан кырылыы көөнньүбүт быыппах иhиитэ, күө-дьаа кэпсэтэн аhааhын саҕаланна. Харба урукку олохтооҕо Алексеев Евгений Евсеевич ахтыы оҥордо. Оскуола директора Лидия Гаврильевна история музейга хаалыа диэн кэлбит дьону суруйан, испииhэктээн ылла. Ол кэннэ бэйээт хоhооннорун ааҕыы, ырыа буолбут хоhооннорун толоруу буолла. "Ньургуhун" тумсуу чилиэннэрэ Пискун Галина Ивановна - Элэктээнэ, Иванова Елена Дмитриевна  - Хатыы, Сидорова Розалия Ефимовна - Ымыычаана кыттыыны ыллылар. Вера Ляшеева Л.Попов ырыаларын толорбутун, кэрэ куолаhын сэргии иhиттилэр.
popov2
Халлааммыт сайыҥҥылыы итиитэ, оппут-маспыт күөх турара тэрээhиммитин өссө ситэрэн биэрдэ. Айан кыттыылаахтара киэҥ ис хоhоонноох тэрээhинтэн астыммыттарын биллэрдилэр.
Бөhүөлэккэ кэлэн баран саҥа оскуоланы, Л.Поповка аналлаах музей сөргүтүллэ турарын көрдүлэр. Бала5ан ыйын 4 күнүгэр бэйээт төрөөбүтэ 100 сылыгар аналлаах тэрээhиҥҥэ көрсүhүөх буолан тарҕастыбыт.
Кэлбит ыалдьыттарга махталбытын тиэрдэбит.
                   Надежда Петрова
Тарҕат:

Комментарии

Защитный код Обновить