СӨ култууратын уонна духуобунай сайдыытын министиэристибэтэ уонна П. А. Ойуунускай аатынан литературнай түмэл тэрийиилэринэн, атырдьах ыйын 14 күнүгэр саха норуодунай бэйиэтэ Леонид Андреевич Попов төрөөбүтэ 100 сылыгар анаан “Илиибэр Эн илииҥ баар курдук” ырыа-хоһоон, ахтыы киэһэтигэр ыраахтан-чугастан ыҥырыылаах ыалдьыттар, суруйааччылар, суруналыыстар, Л.А.Попов уруулара-аймахтара, биир дойдулаахтара, ырыа-хоһоон куттаахтар мунньустан, бэрт истиҥ-иһирэх тэрээһин буолан ааста.
Сүдү талааннаах биир дойдулаахпыт айар үлэтигэр сүгүрүйээччилэр, сэҥээрээччилэр кэлэн саала иһэ баппат киһинэн туолла. Литературнай түмэл, национальнай библиотека уонна суруйааччы урууларын-аймахтарын пуондаларыттан, бэйиэт Л.Попов айар үлэтин, олоҕун көрдөрөр баай ис хоһоонноох быыстапкалар тардылыннылар.
Култуура уонна духуобунай сайдыы миниистирэ Ю.С.Куприянов бэйээт айымньыларын аахпытын уонна бу күнтэн саҕалаан улахан республиканскай, литературнай күрэс биллэриллэрин кэлбит дьон сэҥээрэ иһиттэ.
Бэйиэт дойдутуттан — Сунтаартан улуус дьаһалтатыттан, култуура салалтатыттан, кииннэммит библиотекаттан, "Ньургуһун" түмсүүттэн кэлэн кыттыыны ыллылар. Сунтаар улууһун дьокутааттарын сэбиэтин бэрэсэдээтэлэ У.Д.Попова туох тэрээһиннэр буолан ааспыттарын, былааннанар үлэлэри кэпсиир кэмигэр, суруйааччы төрөөбүт дойдутугар Харбаҕа литературнай айаны хаартыскаларынан, видеонан көрдүбүт.
Бэйээт аатын, үлэтин үйэтитэр араас элбэх үлэ тиһигин быспакка ыытылла турарыттан дьон-сэргэ астынарын биллэрдэ. Ол курдук, суруйааччы төрөөбүт дойдутугар Уһун-Күөлгэ, кини аатын сүгэр саҥа таас оскуола дьэндэйэн балаҕан ыйын 1 күнүгэр аанын тэлэччи аһыаҕа. Ону таһынан, кини аатынан Киин библиотека тутуута саҕаланарын, музей үлэтэ саҥардылларын, сквер аһыллыахтааҕын, кинигэлэр тахсыахтаахтарын о.д.а. үлэлэр бара туралларын истэн дохсун ытыс тыаһынан доҕуһуоллаатылар.
Суруйааччылар Н.И.Харлампьева, И.В.Мигалкин, Н.А.Лугинов, Урсун, Сэмэн Тумат, Ойуку, О.Г.Сидоров, Сайа, Арчылан уо.д.а. ахтыы киэһэтин ситэрэн-хоторон биэрдилэр.
Ахтыыны оҥорбут дьон бэйиэт айар үлэтиттэн интэриэһинэй түгэннэри кэпсээн истээччилэри сэргэхситтилэр, хоһооннорун аахтылар, ырыаларын ыллаатылар.
Аатырбыт ырыаһыт Анегина Ильина ахтыытын эмиэ олус сэргээтилэр. Биллиилээх уонна саҥа ырыаһыттар Бэйээт ырыа буолбут хоһооннорун толордулар: Лина Акимова, Анна Дьячковская, Ефим Авелов уо.д.а. Сунтаар улууһун уонна Тойбохой нэһилиэгин Бочуоттаах олохтооҕо Клара Тихонова байаанын сүкпүтүнэн кэлэн, ырыаларын ыллаан тэрээһини киэргэттэ.
Урукку кинохроникаҕа бэйиэт тыыннаах дьүһүнүн көрөр бэйэтэ эмиэ туһугар долгутуулаах эбит. Киэҥ эйгэҕэ бу документальнай түгэннэртэн киирбит Леонид Попов олоҕун, айар үлэтин сырдатар киинэ өссө көстүө диэн үөртүлэр. Муусука уонна фольклор түмэлэ эмиэ киинэ бэлэмнии сылдьарын иһитиннэрдэ.
Леонид Поповка сыһыаннаах кинигэлэр тахсыбыттар: 50 нуоталаах ырыа кинигэтэ, "Саныыбын төрөөбүт алааспын'' (Герасимов К.А.), ахтыылардаах, сэһэннээх, "Хочо хоһуун хоһоонньута'' (Николаев В.П.). Маны таһынан, сурунаалларга, хаһыаттарга эмиэ элбэх матырыйаал бэчээттэммит. Мустубут дьон Леонид Попов талааннаах суруйааччы эрэ быһыытынан буолбакка, кинини аҕа табаарыс, эрэдээктэр, уопсастыбаннай деятель быһыытынан ахтыылартан, сорохтор саҥа чахчылары истэн биллилэр. Кэлбит дьон тэрээһин бүппүтүн даҕаны кэнниттэн, барыахтарын баҕарбакка ырыа-хоһоон түһүлгэтин салҕыы хааллылар.
Бэйиэккэ аналлаах аныгыскы улахан тэрээһиннэр балаҕан ыйын 5 күнүгэр Сунтаарга уонна ахсынньыга Дьокуускайга буолуохтара.
Сунтаар улууһун култууратын уонна айылгытын салалтата
