Алтай өрөспүүбүлүкэтин А.В. Анохин аатынан Национальнай мусуойга, “Түөрт кынат” (“Четыре крыла”) диэн эдэр худуоһунньук Мира Аргунова номнуо алтыс быыстапкатын арыйда. Манна Саха сирин уонна Алтай кэрэ айылҕатыгар, дьонугар-сэргэтигэр анаммыт 59 хартыыната 200 кв м иэннээх үс сааланан турда.
Ордук “Национальное достояние Родины”, “Якутские пословицы и поговорки” уонна “Хозяйка реки Вилюй” диэн ааспыт сыллаахха Бүлүү өрүскэ буолбут экологическай алдьархайы сырдатар хартыыналар дьон интэриэһин тардаллар. Оттон “Национальное достояние Родины” диэн серияҕа Алтай өрөспүүбүлкэтин уһулуччулаах дьонун мэтириэттэрэ эбилиннилэр. Ол курдук, Арассыыйа уонна Алтай өрөспүүбүлүкэтин үтүөлээх артыыһа Болот Байрышев, тыйаатыр режиссёра, тыйаатыр уонна киинэ артыыһа, Алтай уонна Тыва өрөспүүбүлүкэтин үтүөлээх артыыһа Амаду Мамадакова уонна талааннаах худуоһунньук Аржан Ютеев мэтириэттэрэ буолаллар.
Быыстапкаҕа турбут хартыыналар араас ньыманан суруллубуттар. Быыстапка балаҕан ыйын 30 күнүгэр диэри үлэлиэҕэ.
Мира Аргунова үс сааһыттан уруһуйдуур. Кини 13 саастааҕар уруһуйдаабыт хартыыналара Ходже Насреддине туһунан кинигэҕэ тахсыбыттара. Уопсайа 17 кинигэ тахсыбыт. Олор истэригэр Саха сирин гимнын матыыбын ааптара Кирилл Герасимов хомуурунньуга баар.
Эдэр худуоһунньук 23 Аан дойдутааҕы, Арассыыйатааҕы уонна эрэгийиэннээҕи быстапкаларга кыттыбыта. Ону таһынан, биэс анал быыстапкатын тэрийбитэ: “Созерцание” (Дьокуускай, 2018), “Родная земля” (Дьокуускай, 2018), “Сияние Азии” (“Үргэл” арт-галерея, Дьокуускай, 2018), “Чудные мгновения” (галерея Е. Шапошников аатынан галерея, Нам, 2019), “На крыше мира” (“Киэргэ” галерея, Дьокуускай, 2019).
2018 сыллаахха “Весна в декабре” диэн Валериан Васильев аатынан эдэр худуоһунньуктар бириэмийэлэрин Лауреатынан буолбута. Ону таһынан, “Волшебный фонарь” (Москуба) уонна “Арктический хронотоп” (Дьокуускай) диэн Аан дойдутааҕы быыстапкалар дипломана буолар.
