Өрөспүүбүлүкэбит олохтоохторугар, кинигэни сөбүлээччилэргэ үөрүүлээх сонуммутун тиэрдээри тиэтэйэбит. Ааспыт нэдиэлэҕэ, балаҕан ыйын 12-14 күннэригэр, Новосибирскай куоракка “Сыл кинигэтэ: СИБИРЬ-ЕВРАЗИЯ-2019” норуоттар икки ардыларынааҕы куонкурус ыытылынна.
Бу күрэххэ Арассыыйа араас эрэгийиэннэриттэн уопсайа 130 бырайыак кыттыыны ылла. Аан дойду муннуктарыттан суруйааччылар, поэттар, кириитиктэр Сибиирдээҕи кииҥҥэ мустан ааҕааччыларга араас маастар-кылаастары, кинигэ сүрэхтэниилэрин ыыттылар, экскурсияларга сырыттылар. Үс күн устата кинигэ дьаарбаҥкалара, култуурунай бырагыраамалар, форумнар, литература сэминээрдэрэ ыытылыннылар.
Быйыл “Бичик” кинигэ кыһата хас да кинигэнэн тоҕус номинацияҕа кыттыбыт эбит буоллаҕына, үс бырайыага – дипломант, биир кинигэ –лауреат, оттон биир кинигэ интэриниэт-куоластааһыҥҥа уопсай түмүгүнэн кыайыылаах үрдүк аатын сүктэ! Ол курдук, “Оҕолорго уонна оскуола үөрэнээччилэригэр аналлаах бастыҥ кинигэ” номинацияҕа ааҕааччы киэҥ араҥатыгар туһуламмыт таһаарыылар эрэдээксийэлэрэ таһаарбыт «Мамонт и другие древние животные Сибири: энциклопедия» кинигэ лауреат буолла. Бу энциклопедия матырыйаалларын А.В. Протопопов, Е.Н. Мащенко, Г.Г. Боескоров о.д.а. хомуйдулар. Онтон суруйааччы Виталий Егоров “По следам якутского Хейга” кинигэтэ интэриниэт-куоластааһыҥҥа кыайыылааҕынан ааттанна.
Салгыы призердарынан ааттаннылар: “Бастыҥ кыраайы үөрэтэр кинигэ” номинацияҕа «Шаманы – избранники Небес и духов» (ааптар Р.И. Бравина), “Нон-фикшн бастыҥ таһаарыыта” номинацияҕа дипломанынан «Республика Саха. Год 2017» альбом-кинигэ ааттанна ( хомуйан оҥорооччулар : А. И. Лукинов, Э. Т. Мярикянов), итиэннэ «Готовим счастье по рецепту» диэн биллэр фуд-фотограф Наталья Оконешникова кинигэтэ “Нон-фикшн бастыҥ таһаарыыта” диэн номинацияҕа дипломанынан ааттанна.
Оттон «Лучшее издание, вносящее вклад в развитие евразийского межкультурного сотрудничества» диэн номинацияҕа кыайыылааҕынан Сергей Прачев “Вернуть любовь: пьесы” кинигэтэ ааттанна.
“Бичик” Национальнай кинигэ кыһатын аатыттан салайааччы Август Егоров бары ааҕааччылары, кинигэ ааптардарын уонна кэллиэгэлэрин маннык үрдүк таһымнаах кинигэ куонкуруһугар кыайыылаах аатын ылбыттарынан эҕэрдэтин тиэрдэр.
Наталья Протопопова, “Бичик” кинигэ кыһатын PR-менеджерэ
